香港無車生活

在十月十八日看了一單將軍澳車位王的新聞，令我再一次聯想一個普通家庭，在港生活是否需要擁有一架私家車。事先聲明，我在2009年考獲車牌，咁多年來試過問朋友借車用，亦試過在海外租車代步，偏偏就係從來都未擁有過自己的私家車。

無可否認，擁有一架私家車的方便性是不可取替的，但稍為次一級的代替品卻有很多。一般而言，自己揸車比乘坐公共交通工具快，可以賺回一些時間。但另一方面，我認為唔揸車一樣可以賺回另一些時間及其他東西，利害並不是一面倒。

以下我會講下我們家庭在私家車的替代品，唔揸車賺回來的東西，還有以我們一家為例在有車和無車生活成本上的差距。

私家車的替代品

最天然的替代品是自己對腳，唔係講笑，有唔少家庭十分鐘步程內的距離都會選擇開車。多行路對身體好，心理生理都係，情侶談情，家人談心，慢慢行最好，巴黎的浪漫也是在塞納河邊行出來。

當然唔係任何地方都可以行，呢個時候要利用公共交通工具。自問去過唔少大城市，香港的公共交通系統之方便及四通八達，實屬世界頂級。加上現今科技，要事先計劃行程十分簡單，部份交通工具現在更可預測到站時間，讓乘客可更有效安排等車時間。

最接近私家車的替代品是的士和uber。只要試過係其他城市坐的士，都會發現香港的士係好抵坐同埋好容易搵車。另一樣係uber，試過幾次都感覺良好，司機有禮貌，車箱夠整潔。如果你未試過，我誠意推薦你一試，首兩程有$50優惠，按此登記讓我都有同等優惠。

如果爸爸們在週末計劃了豐富行程，需要游走於香港不同地方，其實租車也是一個不錯的選擇。可以選擇不同的車款，事後亦不用花時間洗車。

唔揸車賺回來的東西

揸車可以省回不少等車轉車時間，雖然也有排隊等泊車的時間，但唔揸車點樣賺時間？秘密在於乘車時間。

一個人的時候，坐車可以睇書可以睇片可以訓覺可以玩電話。以我自己為例，大部份書籍都是在車上面看的，這個blog也有一半以上的文章是在車上打的。

我自己很享受和小朋友一起坐車，佢地係車上面特別多問題。阿仔現在三歲半，已經認得很多地方，識得分青馬大橋和汀九橋，知道有三條煙囪個度係南丫島，這些也是在交通工具上學的。如果揸緊車，我自問無能力可以分心去應付佢層出不窮的問題。

成本比較

以我的家庭為例，我返工放工、老婆接送放學和阿仔返學放學的交通費為一星期$266，假設週末兩日都過海，一個週末的交通費為$240。一星期總交通費為$506，一個月當四個半星期，另再加一個月搭一次$100的士或uber，一個月的交通費為$2,377。

參考一個格價網頁在2014年做的統計，以當時市面其中一款最慳油的細車計算，一年油費為$6,165.9，維修保養$2,780，保費$6,000，牌費$3,929。我居住的屋苑車位比例為1：1.3，供應甚為充足，月租$2,100。平均每月養車花費$3,673。

另假設以$150,000買入該車，參考一個汽車代理的供款計算機，做五年貸款，首期俾$15,000，月供為$2,897。加埋上一段的養車費用，每月支出為$6,570。

以這超簡化的計算去比較，無車生活每月能省回四千大元。

為興趣咩都值

講到尾，好多人當揸車係興趣（特別係男士），咁一個月多花兩三千蚊在興趣上，平均一百蚊日，夠買兩杯中產咖啡。平均都係十蚊日，半杯中產咖啡都買唔到，性價比算唔錯。

我很喜歡陳奕迅的《人車誌》，歌詞講出男人心聲，曲風用上本地少見的acid jazz亦甚為特別。



---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed追蹤半桶水爸爸。