家庭新成員

早前在阿仔的開學文章中提過，幾星期後他便會遇到另一個轉變。這個轉變終於在十三號的零晨時份發生，他正式成為哥哥了。

非常感恩，生產的時間和過程都很順利，母女平安。

老婆當然係超級痛，幸好受苦的時間並不長，入院至出世只係三個鐘，相比生阿仔時痛左廿個鐘分別很大。最大分別是老婆的精神狀況，上次生到昏迷，今次生完之後係精神到訓唔著（雖然已經係零晨四點）。

正如所有事情一樣，老婆的功勞最大，辛苦哂老婆。

右邊係阿仔嬰兒時期的玩具，左邊係新買俾阿女的

講下阿仔，因為老婆是全職媽媽的關係，陪伴阿仔最多就係媽媽。好大膽咁講，佢哋應該從未試過分開多過十二小時，食飯訓覺玩耍最佳伴侶。今次入院生女，四日三夜，只能夠作有限度見面，我哋一直視為一大挑戰。

幸好，阿仔好生性。由媽媽入院至今，只係昨晚訓覺前叫嚷了幾次好掛住媽咪，一直都好合作，在醫院探媽媽和睇妹妹都好乖。原本仲擔心佢唔肯和媽媽說再見，結果佢昨天都好乖咁跟我走。

阿仔，你真係長大得好快啊，快過我們的預期很多呢，爸爸媽媽真係好唔捨得。

最後先講呢篇文既主角，我的小公主。爸爸老早就決定了要把妳養成一個公主了，但似乎妳也不是善男信女，一出世便爆喊。我知，趁妳訓緊覺時逼妳出來，發下小姐脾氣都好正常。但妳真係好有性格，在第一次睇BB的時候，其他BB都係訓覺甜美樣，妳就無時停，仲轉走個頭唔俾人睇。

點都好，爸爸對著這個前世的情人，就一定係心軟架啦。

在親子時間，抱了妳十五分鐘，妳全程眼仔碌碌咁望住爸爸媽媽，真係好可愛。可能我當時個樣太幸福，老婆在隔離都忍唔住話，下世輪到我抱住佢了。

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed追蹤半桶水爸爸。