小童遊九州 (兒童景點加食住行使費)

在剛過去的一星期，一家四口去了九州玩七日，今次算得上係我哋兩公婆去左咁多年旅行最輕鬆休閒的一次，每日都只安排一兩個節目，大家都可以好舒服地享受今次旅程。

七日雖然唔短，我哋既活動範圍都主要在九州北部，以福岡為中心，最遠去了大分縣的湯布院和佐賀縣的大牟田。

先講有咩適合小朋友玩，之後再講下食住行既使費。

麵包超人博物館

這個不用多作介紹吧，相信大部份小朋友都會鍾意。阿哥一歲既時候去過橫濱和香川的麵包超人博物館，當時只係玩到小部份遊戲，而家四歲半就全部遊戲都玩到了。當全場九成以上的小朋友去哂睇表演的時候，佢就好醒咁樣選擇唔睇表演去玩遊戲，唔駛等任玩。阿妹就好似當年既阿哥，只係玩到部份遊戲同睇表演，都很滿足的樣子了。

海之中道海濱公園

我們睇少了這個公園，這裡可以玩足一整日，甚至兩日！我們今次只是玩了兒童樂園區，見到既已經有超長八爪魚滑梯(可惜維修中)、勁好玩的大型帳篷式彈床、一個較正常的遊樂場、一個歷奇形遊樂區域、一個室內遊戲區，唔排除仲有未見到既設施。呢個海之中道海濱公園內仲有水上世界(只限夏天開放)、動物園、花園廣場和露天劇場，有得租單車，聖誕節呢幾日夜晚仲有煙花睇。

大濠公園/舞鶴公園

臨時安排在一個早上的景點，原本想去舞鶴公園，因為旅遊書介紹有超長滑梯和繩索陣。結果係途中被路經的大濠公園吸引，這裡有一個好靚又大的湖，好多人係度跑步和散步，在旁邊有一個兒童公園，因為有些設施都幾特別，所以我們在這都玩了一個多小時，之後便放棄了舞鶴公園。如果有機會，好想圍繞個湖跑一圈。

九州自然野生動物園

這動物園最大賣點便是可以好似非洲大草原咁，坐係鐵籠動物車入面餵動物，獅子老虎大笨象應有盡有，除此之外亦可以親身接觸小動物。不過都要開始諗下點樣灌輸俾小朋友知道，動物其實唔應該屬於動物園。

諏訪公園

在大牟田的這個公園，我們專程揸了一個半小時車到來，事後確定是值得的。終於係呢度玩到超長滑梯，點到點要滑足足一分鐘的長滑梯，以鐵輪滑動，屁股受難，但真係好玩。爬上滑梯都唔係行樓梯咁簡單，要行繩索和爬斜坡。另外亦有較低難度的俾年紀較輕的小朋友玩。我們玩了差不多兩小時。

好了，和以住的童遊系列(首爾、台北、台中)唔同，今次我講多少少關於支出方面的事吧。

九州食住行使費

食方面，我們沒有刻意搵高級的餐廳，以我們這樣的家庭組合，最重要的是座位較濶大、環境衛生和有食物款式適合小朋友進食。我們通常是自備了食物給阿妹，另外我們再點三個人的份量。憑記憶和感覺，在九州的餐廳唔貴，大約一千日元一份定食吧。

住方面，老婆安排得很好，六晚住了三種類型的住宿。頭兩晚住了在博多站附近的東橫Inn，之後在湯布院住了一晚附設私家露天風呂的溫泉旅館(御宿仙壽)，最後三晚則是在Airbnb訂的民宿，在博多站附近。六晚加埋大約六千港幣。

交通方面，頭兩天依靠地下鐵在福岡市內活動，地下鐵有一天票，大約坐三次便回本，遊客應該很容易達標。之後四天便是租車自駕，又係Toyota Rent A Car，用開都無特別諗其他。租左P2級別的車，官網例子是Ractis，現場被分派的是Tank，後座和車尾箱夠大便沒有問題。

租車三日又十一小時，加租用ETC和最高級別保險，連稅費用是35,127日元。入油用了5,039日元，唔好意思無睇行左幾多公里。

租車時被遊說購買九州高速公路通行証(Kyushu Expressway Pass, 簡稱KEP)，可以任意使用大部份九州的高速公路，四天pass為5,500日元(另加620日元為銷售店的收費)，最後總結為節省了大約一千日元，畢竟我們不是去了很遠的地方。另外KEP不包括的都市高速公路也使用了3,580日元。

最後講埋飛機票，HK Express三個座位加一個手抱嬰兒，連稅加行李費，成為港幣$12,836。

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

這是你的第一次到訪嗎？由這裡開始認識我們吧。

想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。