2017年9月13日 星期三

孩子興趣班的二三事

最近呢幾個月,太太不時都會問我,阿仔係咪學得太多野。同一時間,每次和朋友講起阿仔而家學緊咩嘢,佢哋都會問會唔會太多,明示或暗示我哋係怪獸家長。其實,在之前K1學期尾聲的家長日,我們都就興趣班呢個問題和班主任討論過。

以下係我既一些感想,閣下有意見可以說出來討論。但請緊記一點,我沒有說自己一定正確,請你也不要認為自己一定正確。


首先,講下到底學緊咩嘢,有幾怪獸。

英文班一星期兩堂,普通話班、音樂班、游水班、足球班、話劇班和畫畫班一星期一堂。英文班和畫畫班在暑假期間因為老師回祖家而暫停了(其實他們是兩母子),在九月才重新開始。普通話班是新的,上星期才開始學。足球班也只是上了一堂便因為球場維修暫時停止,預計十月繼續。話劇班的暑假課程在八月完了,下一期在九月尾開始。

以數目睇,七個興趣班,一星期八個鐘,感覺上對於一個剛上K2的小男孩真的好像有點過多。唔通我哋真係催谷型既怪獸家長?行多一步,睇深入少少才做結論吧。

家長讀者如果有留意閣下子女課外活動的話,應該會知道有些興趣班是以考獲證書為目標,而得到證書的目的是加強孩子在報考學校時的競爭力。

而我自己,係呢一個時候,可以好自豪咁講,阿仔七個興趣班入面無一個係為左證書而讀的。

英文和普通話,我們希望阿仔可以學習到基本的日常生活溝通能力。我們自己係屋企提供唔到一個外語環境,所以只好找一些家庭教師,讓他習慣一下外語環境,學習一下基本的應對。

音樂班是真正的音樂班,不是樂器班。課堂上是透過很多的遊戲,感受和學習音樂的主要元素,例如音調、大細聲、節奏和合奏。這是陪養興趣的一個課程。阿仔學得唔錯,亦表現出他的興趣,除了平常經常唱課堂上學的歌之外,令我驚喜的是有一次他無意中看到一個歌譜,竟然自己do-re-mi唱起來,效果係點唔重要,但有這好奇心已經值回票價。

游水班是強身健體,阿仔氣管同我一樣咁弱。足球班是學習團體合作及感受輸波的失敗感覺。話劇班和畫畫班純粹為興趣,試過一個課程後,阿仔要求繼續上的,我們也當係俾佢去玩。

我們是一對不吝惜讚賞的家長,每次看到孩子有新的嘗試或進步時,我們也會讚賞的。而當他遇到困難時,也會以正面的態度和他慢慢地溝通,讓他嘗試用不同的方法去解決。

可能是因為這原因,現在他也很樂於作出不同的嘗試和喜歡學習新的東西(初初並不是這樣的)。但這產生了另一個問題,就是興趣太多。我擔心將來週身刀無張利,所以專登請教了當時K1的班主任(即是我在三人世界 - 讓孩子獨佔父母的機會提到的那位老師)。

老師的建議是在阿仔這個年紀,如果是負擔得到及該活動是安全的,也應該讓孩子多作嘗試。她提到一個重點,就是如果課程開始了,孩子卻失去了興趣,無論如何也需要他完成整個課程(當然有安全問題除外)。她解釋這是一個責任的問題,不能讓孩子以為所有事情也是可以隨意和任性的,這個承擔需要在一開始便讓他知道及接受,否則不應該開始該課程。

我們很認同這個講法,亦一直遵守著,而這亦帶出另一個我們給孩子上興趣班的特點,就是他擁有要求結束的權利。我們會了解他唔上的原因,看看是課堂方式或內容不適合他,還是他真的已經唔再鍾意。英文和普通話我們會比較嚴格,假如真的要結束,我們會找尋另外一些以不同方式教授的老師。其他的興趣班決定了結束也沒有多大問題,但必須完成課程。

最後一點,我們希望孩子能夠開心學習,但並不代表沒有壓力。如果我們看到他因為分心和未盡全力而跟不上進度,亦不會輕易放過他的。在未爆發之前,我們還是會耐心地和他了解及解釋,協助他可以完成目標(EQ用盡,爆發了便另作別論啦)。

其實我覺得怪獸與否都唔重要,更重要是能夠保留到小孩對新事物的好奇心,和不要因為這些事情而影響到家庭關係和嚴重破壞生活節奏。

家長們,一起努力吧!

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

16 則留言:

  1. 話說以前舊老細話個女想試下結他, 根住唔知邊條粉皮篤爆我有玩開
    個老細又真係夠膽死問我借, 聽講個女兩個月已經冇咩興趣, 但老細個諗法同你一樣, 唔可以比個女三分鐘熱度

    結果我成半年先贖得番我老婆....

    回覆刪除
    回覆
    1. 嘩頂,你老闆真係面皮厚。幾百蚊都買到支入門yamama結他啦,玩電配埋個amp仔都係千五蚊樓下,咁都要問人借半年,過份左D啦

      刪除
    2. 我個人又專一, 就剩係得一個老婆
      搞到我孤家寡人左半年
      ( ཀ ʖ̯ ཀ)

      刪除
    3. 愈諗愈過份啦,有多餘或用唔著就話可以借姐,平時練開無啦啦俾人租走左半年真係好無奈。

      刪除
    4. 唔知邊條粉皮篤爆我有相機, 老細夠膽死問我借貴鏡頭......

      刪除
    5. 賤老闆和更賤既粉皮!

      其實呢類老闆真係short short地,有D野係人地心頭好,邊可以隨便借俾人,老闆大哂呀。。。

      刪除
  2. 我諗起個女幼稚園時都同時上唔少興趣班,英文、芭蕾舞、鋼琴、中國舞、跆拳道、畫畫班等,加上幼稚園本身都有興趣班,我諗唔會比你少。但佢好鍾意上,覺得好玩,因為我地志在乜都俾佢試下,無話要考乜考物。
    上咗小學後,學業開始吃緊,開始淘汰啲佢無興趣而我地又覺得放棄無所謂嘅,依家剩返芭蕾舞、鋼琴與日文(日文係佢堅持要學嘅)。

    回覆刪除
    回覆
    1. 原來風兄女兒都係咁,我就放心得多,多謝風兄分享心得。

      其實我覺得幼稚園學生咁細個,興趣一定不斷轉變,咩都試下,慢慢長大後佢自己會選擇到自己最鍾意係咩。

      刪除
    2. 其實幼稚園只係返三幾粒鐘,又無乜功課,小朋友全身啲電無處發泄,返下興趣班咪當消遣囉,等佢唔使咁悶,時間又唔係長,唔使諗咁多嘅!

      刪除
    3. 風兄真係講中哂,我個仔讀果間仲要係區內出名既happy school,功課量極少,放學之後真係好得閒

      刪除
  3. 我直接想到的是成本問題, Mike兄太太已/準備為全職家庭主婦仍能負擔得起, 看來 Mike兄是高收入人士! 哈哈!

    回覆刪除
    回覆
    1. 絕對唔高啦。

      平時生活好慳,基本上無咩錢剩,月月清

      刪除
    2. 就算是月月清都好, 為了子女健康成長, 作為父親就算多辛苦也願意!

      刪除
    3. 最緊要佢地身體健康,錢唔夠就搵多D免費或平價活動,香港都好多呢類免費活動,其實大人缺時間的問題大於缺錢

      刪除
  4. 其實語文老師先係最重要既,識教同唔識教係差天共地,特別係能夠玩住學既更難

    回覆刪除
    回覆
    1. 好既老師真的很重要,能夠提起小孩的學習興趣,吸引的效果好很多

      刪除