關於全職媽媽的決定

開blog以來，一直想寫一篇關於做全職媽媽(或全職爸爸，以下全部簡稱為全職媽媽)的文章，諗左幾年，第二個小朋友都快要一歲，終於落手寫(其實係打)。

事先聲明，以下全部內容均為我自己的個人感想，閣下有意見可以說出來討論。但請緊記一點，我沒有說自己一定正確，請你也不要認為自己一定正確。

全職媽媽同坐監其實分別不大

好了，入正題，首先我想講一個重點，做全職媽媽，由頭到尾都是一種犧牲。試想像一位在職媽媽，在公司八面玲瓏，打扮穿著入時，每晚放工後都可以優雅地返屋企，然後家中的小孩一聽見插鎖匙的聲音，便已經像餓狼一樣擁上，雖然應付得有點狼狽，但家中有人在期待著的感覺還是很好的。

另一方面，全職媽媽由張開眼睛開始便一直忙過不停，照顧小朋友的返學放學和煮飯食飯，應付了一整天，早已身心俱疲。好了，終於等到另一半放工回來，小朋友終於願意稍為放開妳一下，但那條友仔竟然還在施施然地換衫洗手，然後還要幫部電話差電，再掃多兩下面書，先捨得睇下小朋友。如果身邊有把槍，應該可以立即打爆條衰佬個頭。

當然，有人話全職媽媽份工係對住自己心愛既小朋友，出外打工對住D膠人邊有得比。但返過工既人都應該知道，群埋幾條八公八婆，係pantry吹水係幾咁過癮。然後係上一篇<你快樂嗎？>我都講過，我返工最開心既時刻就係放飯同放工，對於一個全職媽媽黎講，食飯係同時間競賽，放工係一個陌生既動詞，佢哋對於等老公放工呢個目標比較熟悉。

咁好啦，講到咁慘，點解仲要做全職媽媽呢？

有些家庭是別無選擇的，沒有親友可以幫忙，亦無法依靠工人。但我們是有可靠家人可以幫忙的，太太的收入亦絕對足夠請多於一位的外藉工人，請工人引起的土地問題亦不是很大。所以，我們是真的選擇了讓我太太成為全職媽媽的。是一個選擇，而不是一個無法避免的結果。

所以以上的問題應該改為，點解選擇支持我老婆做全職媽媽呢？

最大原因，是我們深信我們現在最重要的事，是能夠親身見證和陪伴小朋友成長。當然有些家庭重質不重量，每天數小時或週末一兩天，已經能夠產生很多可以成為美好回憶的親子黃金時間。但我們比較貪心，我們同時希望得到質和量，我們不想錯過每一刻。

其他人可以話我哋短視，放棄夫婦其中一邊的收入，搵多幾個錢，將來早些財自退休，大把時間陪伴家人吧。係架，講得無錯，但我哋細膽，驚小朋友入讀小學之後已經不再好像現在這樣親密地需要我們。你可以把退休提早，但卻沒有能力將孩子的成長減慢。

我們是真的很重視和小朋友一起的時間，老婆係全職媽媽固然係，而我自己係舊公司一星期有兩日在家工作，連埋週末，即是一星期有多於一半時間是可以很容易地接觸到家人的。而在阿女出世時，我亦調校好裸辭的時間，讓自己有幾個月可以幫輕一下太太，照顧多些初生的女兒，還有最重要的是陪伴阿仔去慢慢接受自己成為了哥哥的這個轉變。

有人認為有全職媽媽親身照顧的小朋友成長得最好，我自己唔會咁講。小朋友是大人的一面鏡，唔好既野睇少一點影響少一點。懂得陪伴成長才是最重要。而我自己對太太在這方面的信心是爆棚的。

老老實實，現實生活都係要講錢，無錢又點可以負擔得起一個全職媽媽。真係咁？！當然，錢唔係萬能，無錢就真係萬萬不能。但係咪真係要搵好多？

小弟普通一個銀行IT職員，人工唔會好高。對於傳統零售銀行黎講，IT係成本，唔係賺錢既地方。銀行IT狗的人工，和一般大中小企老闆，甚至和幫公司賺錢，人工以佣金為主的打工仔亦相差好遠。

其實呢件事同達成財務自由一樣，最重要的不是你搵幾多，而係你使幾多。控制到支出(都話係犧牲黎架啦)，計得掂條數，其實就可以一試(試下你捱唔捱得住咋，錢銀問題其實唔係咁大)。

雖然犧牲了很多，但我還是相信老婆得到的比失去的更多(幸好我個頭仲未被一槍射爆)。

每一位全職媽媽和全職爸爸，加油！

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。