慳錢夫婦

我地兩公婆真係好慳

大家都應該知道，支出比收入更能決定你的財富，極高儲蓄率可以提早退休環遊世界。

重覆一次，我地兩公婆真係好慳。由大學讀電腦，到畢業出黎做IT狗，前前後後十幾年。我地終於買第一部手提電腦。

IBM Thinkpad x200s，配備Core2Due L9600 CPU、4G RAM、320G harddisk，盛惠六百二十蚊人仔。

人仔？620蚊？

無錯，我地幾十歲人買既第一部手提電腦，竟然係淘寶2手貨。精美包裝、火牛跟香港製式三腳插、送電腦袋滑鼠等無謂野，睇住我收貨拆盒的同事話新既一樣。

十年前的貨色，開機一分鐘都唔駛，快。充電後玩左個零鐘仲有60%電，持久。

最擔心係電，畢竟中國的都會爆炸，緊記唔可以通宵或無人係屋企的時候充電。第二樣係擔心數據，二手硬碟信唔過，上週末係黃金買左隻Transcend SSD硬碟，買完先知原來SSD都有分SLC、MLC和TLC，買左速度和耐用度都較弱的TLC。

原來換notebook harddisk咁簡單，拆螺絲，一抽一插就搞掂。

可能上天見我地買labtop咁平，慳左筆錢，就俾個機會我地換電視。

屋企部電視係2010年新婚加新居，父母送的禮物，都話有爸媽的孩子像個寶，Panasonic 42" Plasma電視，當時絕對係天價，如果要自己俾錢肯定唔會買咁貴。

星期日部電視竟然開著兩秒之後自動熄機，我早一晚仲用佢黎睇《教父》，而五年保用亦老早過了。

偵探一般的老婆發現電視在自動熄機後會閃動紅燈11下，上網調查得知原來紅燈閃動11下代表風扇可能有問題（詳情看附錄），再上網睇下，竟然有人話可以係淘寶廿蚊買隻風扇換左佢。

順便講下，都係網上資料，原廠師傅上門檢查費是$750，一隻風扇$150。今時今日，4K電視都係賣緊$4K，俾千幾蚊去維修一部差不多十年電視真係好令人卻步。但自己試下未嘗不可，結果我便在週一晚上拆開了自己的電視機。

拆開了的Plasma

好肯定咁講，用左咁耐的電視機入面當然佈滿灰塵，風扇更加係重災區，堆積的灰塵比扇葉更厚！

神奇的事情發生了，我在清潔風扇後，電視竟然神奇地恢復正常！！！！

更神奇的事情，是原來我不是孤獨的電視維修員，電視回複正常後竟然見到石堅和萬子良都係度整緊電視機，幾咁橋。

石堅萬子良整電視

我地兩公婆真係好慳，買二手電腦，自己維修電視（其實我早前還成功維修了數碼相機的shutter），平凡打工仔可以俾太太做全職媽媽都係靠慳（前提是老婆願意做這苦工），但在喜歡的地方倒不會太慳。

70兄share了一位自稱貴族的人兄給我們，他的言論得啖笑，無謂提了，但那位人兄曬命的餐廳我卻一眼認出，因為我都食過唔少。。。

其實識搵，識慳，仲要識駛。

-----

附錄 - 電視閃燈意思

電源閃1下 DG板 不良(與MICOM聯繫錯誤)
電源閃2下 P板或D板不良(15V SOS)
電源閃3下 P板或D板不良(3.3 SOS)
電源閃4下 P板不良(POWER SOS)
電源閃5下 P板或D板不良(5V SOS)
電源閃6下 SC板 或 SD板 或 D板 或 PANEL不良(須逐步檢測)
電源閃7下 SC板 或 SD板 或 D板 或 P板 或 PDP PANEL不良(須逐步檢測)
電源閃8下 SS板 或SC板 或 P板 或 D板 不良(須逐步檢測)
電源閃10下 P板 或 H板 或 DG板 不良(SUB 5V SOS ,MAIN3.3V SOS ,DTV 9V SOS)
電源閃11下 PB板 或 H板 或 DG板 不良(FAN SOS)
電源閃12下 P板或H板不良(SOUND SOS)
電源閃13下 DG板 不良(通訊錯誤 檢測IC8001)

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

這是你的第一次到訪嗎？由這裡開始認識我們吧。

想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。