2014年9月23日 星期二

勢利鬼還是月光族?

近期熱話當然是搶購和炒賣電話,半桶水爸爸也有參與這個遊戲,可惜耐力及運氣也技不如人,暫時並無任何斬獲。和朋友見面自然也離不開這個熱門話題,原來不少朋友也打算保留一部自用,七八千蚊一部電話,值唔值真係見仁見智,半桶水爸爸無咩特別意見。

但半桶水爸爸發現,有些朋友在這數年間,每次這品牌推出新電話他們也會隨即跟上,那麼這便肯定是一個"需要"和"想要"失去平衡的消費心態問題。

半桶水爸爸好肯定自己和太太在消費方面也是十分克制的。旁人可能看見我們每年都會去海外旅行,又好像經常光顧高級餐廳。事實上每次旅行我們也花了很多個晚上去格價,機票食宿和當地交通,一蚊都唔會放過。而那些高級餐廳,背後是多少餐M記廿一蚊餐和住家便飯,平時有幾慳又有邊個知道?

好了,閒話唔講咁多,令半桶水爸爸苦惱的問題,是如何灌輸這"優良傳統"給下一代?

首先由根源諗起,到底咩野因素會影響到一個人的消費心理?其實不外乎家庭和成長環境。

正如很多親子理財書所講,我相信小朋友愈早知道金錢和工作的關係,對他們建立良好的消費觀念是很有幫助的。

半桶水爸爸的父母是在街邊賣報紙的小販,細路仔果陣我們幾姐弟已經要幫手睇檔。半桶水爸爸好細個已經知道金錢得來不易,一份報紙賺個幾,一包煙賺幾蚊,打風落雨都要開檔,真正的手停口停。半桶水爸爸對金錢很敏感,知道買一盒BB戰士模型等如要老豆賣二十份報紙,所以一向都甚少主動要求買玩具。

第二點是家長應付小朋友要求的態度。現時很多家庭屬於不富貴也不貧窮的狀況,唔係中產又唔係低下階層,對於子女的物質要求,基本上大多也是可以應付的,最後便造成很多有求必應的家長,更過份的是孩子未開口,長輩已經大量供應,試問在這種環境長大,孩子點會懂得爭取及珍惜?

Malcolm Gladwell的新書《David and Goliath》也有提到同樣的問題,他說其實很多人也清楚知道這問題的根源及解決辦法,但偏偏就是很難做到,特別是富有家庭,相反貧窮家庭便完全沒有這個問題。這是可以做而不去做和根本做不到的分別。家長要做到可以做而不去做,真的不容易,但請謹記假如做到,而孩子又能夠明白,收穫將會很豐富。

每次講孩子理財態度,也會擔心孩子將來變得過份勢利。但如果孩子真的笨得不懂調節,那麼做一個勢利鬼應該好過一個月光族。



2014年9月15日 星期一

星期一早上的勵志文,關於學習。

初初出來工作個幾年,其中一位老闆講過一番說話,半桶水爸爸印象好深刻。隨著年紀增長和兒子出生,感覺更加認同。

老闆說她很讚成她手下的員工在工作時間去上堂,她說假如在一個一日的課堂,能夠學得到一樣野,即使和工作無關,事後可以袋到落自己袋,那便物有所值了。

半桶水爸爸當時聽到,覺得幾有意思,並將呢個概念套用在其他地方,例如睇一部電影,讀一本書,甚至去一次旅行。那麼要得到甚麼呢?具體可以是一種技能,甚至是一種感想和一個啟發。如果事後有野袋到,那麼便是賺左。

讀一本數百頁的書,閱讀的速度和吸收的程度,視乎讀者和作者的連繫,還有讀者的心情和經驗。半桶水爸爸之前第一次讀村上春樹的《沒有色彩的多崎作和他的巡禮之年》,只看到故事。之後在隔了一段很短的時間,重讀了一次,確實地得到劇情外的體會。

隨著年紀增長,我們容易變得封閉,不再突破,不再改變自己。要學到一個新的意念並加以應用,其實好難。

看見兒子由轉身都唔識,到現在行走自如,識講既野愈來愈多,真的感到很神奇,他真正是每一天也在學習。可能因為呢個原因,小孩總是快樂的。可能因為呢個原因,大人看見小孩也總是快樂的。

成年人也應該努力,不要成為一件死物。突破自己,跑一個從未跑過既長距離跑步,彈一首曾經覺得好難學既歌,讀一本曾經令你卻步的書。睇完一套戲,一部電視劇,一個電視節目,唔好睇完就算,試下諗下有無咩係特別認同,甚至有無咩得著。

加油吧,成年人的人生真的不應只有工作。



2014年9月13日 星期六

嚴父?

今日睇報紙專欄,作者Piers Darkins話成日都有人說他很幸運,因為他的女兒都很乖巧,作者解釋其實佢背後造左好多野。節錄如下,全文在這裡

"我很幸運,我的孩子都很善良和很得人寵愛,但能教養她們變得如此乖巧並非運氣,背後我們做了很多工夫,很多很多工夫。

我的期望從來沒有變,我的標準也從來沒有降低。"

半桶水爸爸對仔仔也十分嚴厲,經常都希望仔仔可以盡早自立及生活得有紀律,太太甚至話過我係軍訓。

好多人希望小朋友在學業上做得很好,但那只是人生的頭二十年,半桶水爸爸更關心他畢業後所面對的世界。學會做一個有用的人,不要做一個高分低能。



再談價值投資

近期有幾個理財博客都討論到甚麼是價值投資,半桶水爸爸都曾經好簡短咁講過自己對價值投資的理解及感想,現在重溫一下先。(全文在這裡)

############

價值投資者並不須要經常進行買賣及太過著緊於股價的變化,投資者的時間和心機應該用於研究公司的資產及獲利能力去計算真正的價值,之後再等待時機買進一定數量價格被低估的股份,以低成本享受公司的發展。如果市場情緒及喜好改變,持有的股份價格被過份高估,便將股票賣出,將資金投入其他被低估的股份。

半桶水爸爸確信價值投資是有效及可帶來豐厚回報的,但這需要高度的紀律性及花大量時間作深入研究,持有一籃子股票亦須要大量資金,一般投資者並不容易做到。半桶水爸爸有正職,亦希望多些時間陪伴家人朋友,亦懷疑自己沒有足夠的紀律,所以半桶水爸爸以往一直在進行著不太正宗及完善的價值投資。

############

再補充一下,半桶水爸爸覺得價值投資者都有兩種。第一種係超級高手,如果有些股票已經升左一排,而佢地又計到佢既價值重係低過股價好多,佢地都會勇敢地去馬。另一種就在垃圾堆中揾食,睇下有咩好野被低估緊,計好數,就食住息等價值慢慢反映在股價之上。

第一種人係天才,有紀律咁做一定發達,半桶水爸爸自問就無咁既能力。

第二種比較適合平民,耐性在這類操作中十分重要,因為唔知要等幾耐,但散户最大既優點就係時間。有些時候這類人真係好變態,他們情願股價慢慢走,因為可以儲多點貨。

半桶水爸爸只求做第二種,其實真係好變態,通常我睇報紙都係對壞消息比較有興趣,沉到無朋友既內銀一倉都係,近排仲睇緊開始減速(甚至飽和)既澳門博彩股,真係幾犯賤。



2014年9月10日 星期三

半桶水爸爸護兒不力

半桶水爸爸自小在街頭長大,自問惡人傻人都見得多。今次同仔仔係玩具店遇上一名頑童,竟然搞到保護唔到仔仔,諗番轉頭真係無鬼用。

話說在剛過去的星期六,我地一家三口去了行玩具店(好大間,玩具放哂出來任玩果間)。其實我地經常都去這玩具店,俾仔仔行下玩下咩都搞下,放下電,佢又唔會扭計要買玩具。

當日玩具店放了兩塊白板及一些磁石字母,兩塊白板打對面放,各有一堆磁石字母,河水不犯井水。仔仔在一邊玩緊,另一邊有個哥哥仔玩緊。那個哥哥仔大約五歲,還有一個弟弟,爸爸媽媽和他們來的。

那個哥哥仔對他的白板及字母十分緊張,任何小朋友行經他的位置,他也會舉起手去格擋,即使人家根本對他沒有任何興趣。

無耐之後,仔仔玩到無咩興趣,起身走人,但係仲揸住一個字母磁石,半桶水爸爸諗住等佢唔覺意就拎番放回原位。點知果個哥哥仔都見到,縱使我地已經行過左幾行,果位字母原本亦唔屬於佢果邊,佢都要跑住咁走埋我地度話要攞番。

太太見到佢來勢洶洶,立即出聲提醒站在兒子身旁的半桶水爸爸小心。半桶水爸爸立即同果位哥哥仔講,那塊磁石並不是屬於佢玩緊個塊板。但說是遲那時快,他已經從仔仔手中搶走字母磁石,可憐的仔仔都唔知發生左咩事!

事後回想,半桶水爸爸實在是做錯左。果位哥哥仔明顯係有問題,佢父母又唔多理佢,由一開始我就一心只想盡快擺脫佢,不要和他多作交涉。加上半桶水爸爸一向崇尚自由成長,很多時都盡量讓仔仔自己接觸事物。但今次真的沒有好好咁保護仔仔,其實如果覺都個哥哥仔有問題,就應該保護好仔仔。畢竟仔仔歲半都未夠,點可能知道要小心咩人。

今次真係上左寶貴既一課,幸好仔仔咩事都無。



2014年9月8日 星期一

滬港通?

滬港通已經肯定係事在必行,半桶水爸爸先和大家分享一段對話,再講下自己有咩感想。

半桶水爸爸有一些國內同事,雖然我們投資意念好唔同,閒時我們也會談及股市的一些新聞,今次就講到近期的熱門話題—滬港通。

國內同事:「你有聽過滬港通嗎!」

半:「當然有啦,你有心水港股嗎?」

國內同事:「聽說港股沒有漲停機制。」

半:「沒有呀。但據我所知,並不是所有股票也在滬港通的範圍內,初期也只是那些大市值股票,它們通常無咩機會單日升跌多過5%。」

國內同事:「呀,是嗎?」

半:「對呀,你自己看看吧,如果你喜歡那些短期上升幾十個百仙的股票,港股可能會令你失望。」

話題一轉,他突然講起他的投資態度。

國內同事:「我近期開始轉做中長線。」

半:「是嗎?」

國內同事:「我最近發現,要在七至九月買股票,之後必須在十月的四中全會前賣哂。」

半:「咁即係得幾個月,有幾咁長線呀?」

國內同事:「我有些股票是不賣的,就是停了板那些。」

半:「那麼這是不能賣,不是你選擇不去賣呢!」

國內同事:「通常它們一復板,便會連續漲停數天。我現在也持有一隻停了板。」

半:「那假如永遠不復板呢?」

國內同事:「不會的,A股是有進無退的,總會復板,不用怕。」

半:「那公司倒閉了怎麼辦?」

國內同事:「咁我又無諗過。」

講到呢度,大家可能會覺得,這位國內同事只是一個股市新手並且想祝佢好運。事實上,以我所知他起碼有五年投資經驗,據他所講,他的回報率是半桶水爸爸望塵莫及的。

這次分享,無非想俾大家感受下國內股民的心態。當然,香港也是有不少這種"幸運"的股民。

說回滬港通吧,先談A股。無可厚非,滬港通絕對是較有利於A股市場的。一現的A股市場,股民對大市值股票興趣十分低,主要是不喜歡它們波幅細,利潤低。

打通滬港通後,那些外資及香港資金,起碼那些指數基金,也會大舉買入A股的大市值股票。股價無非也是反映供求效應,可以幻想滬港通後A股那些高市值股票的股價會向上,不排除國內股民到時會跟風推埋一份。

有心有力既,應該學博客巴黎兄,早幾個月就開定户口買內銀A股。簡單既就揾機會儲下A股ETF,不過已經炒起哂,半桶水爸爸都淨係只係2822最初上市同埋今年三月買過,之後一直覺得追唔過。

咁港股會點?

其實半桶水爸爸覺得港股一向都有好多外來資金,滬港通既對港股市場既發展無咩特別幫助,反而可能會令市場波幅大左。

半桶水爸爸認為滬港通有機會令到市場先生作出更多錯誤決定,投資者應作好準備。

最後送大家一條彩虹,今朝半桶水爸爸在家拍的,祝大家中秋節快樂。



2014年9月4日 星期四

股市破頂的感覺?

昨晚食飯的時候,電視新聞報導恆指突破了六年高位。近年聽到這種新聞,半桶水爸爸都有一種奇怪的感覺。雖然現時持股量不少,身家確實是隨升市提升了一些,但事實上並沒有特別興奮,反而有一種抽離的感覺。

假如情況相反,出現大跌市,半桶水爸爸的心情應該會更為高興及投入。原因其實很簡單,這純粹反映了半桶水爸爸現時對投資理財的心態。

再講多次,半桶水爸爸的目標是早日達成財務自由,即是當手頭上資產所產生的現金流,足以應付日常開支。

現階段距離目標實現,仲有一段好長既路,股市投資對半桶水爸爸而言,盡量收隻多些優質股票是首要目標。未進入收成期,股票大升反而影響了收隻優質資產的機會。

股價向上,當然可以套現獲利,但隨之而來的問題是如何運用那筆現金,一唔小心,好容易手快買錯野。早前半桶水爸爸套現了小許股票,現在也只是閒置中。



2014年9月1日 星期一

性本善2014

星期六晚十點半,如果大家無任達華咁fit,都好大機會係屋企睇緊電視。但如果唔想翻睇《半澤直樹》,睇《年輕人們》又太慘情,睇英超見到曼聯沉淪又有少少心悒,其實,都重有其他選擇既。

《性本善2014》係港台電視全新節目,星期六晚十點半。頭半集係故事,後半集係嘉賓討論。半桶水爸爸睇左兩集,感覺良好,故事唔老土,卡士唔錯,亦無說教味道。

好多朋友仔都尚係未婚或者二人世界緊,今集幾適合佢地睇,生唔生小朋友真係唔係一個簡單的問題,搞唔好,影響可以好大。

半桶水爸爸同太太係呢一方面十分有同識,我地都好鍾意小朋友,亦親眼見到養育一個小朋友所需要既責任及付出,但我地都願意一同承擔,真的十分幸運。

題外話,今集嘉賓有楊張新悅。半桶水爸爸上個世紀睇《求戀期》個陣,佢仲係叫張燊悅。佢而家已經就快生第三個了,真係十年人事幾翻新。