2017年1月20日 星期五

十年迪士尼

原來香港迪士尼已經開左超過十年,真係時光飛逝,回想當年有一首大熱歌曲,Kelly Jackie的《他約我去迪士尼》。事隔十年,現在只會係警訊見到Kelly Jackie拍住靚仔阿sir做主持。當時仲會覺得佢個名好奇怪,不過而家連Angelababy呢類名都睇到慣哂,係眼界闊左,定係盲目左?



2005年,現在的老婆是當年的女朋友,既然已經一齊左就講唔上佢約我定我約佢啦,總之開幕之後隔左一排無咁多人就去左,我懷疑係佢生日,即係2005年年尾。由一開始勁多人,咩都要排隊攞快証,到後來滿佈自由行,我地斷斷續續咁幾年去一次,都叫做見證了呢十年的變化。(講開又講,老婆十年前已經係我女朋友,即係已經係埋一齊多過十年,一個好女子,就咁斷送了差不多整個二十幾歲大好年華給我。)

直至到阿仔兩歲左右,開始識玩同埋認得好多卡通人物,我們便好像一般港豬家長一樣,買年票,然後一年去勁多次。舊年阿仔三歲生日,我地甚至係迪士尼酒店住左一晚。


迪士尼酒店過生日
迪士尼酒店過生日


其實,我唔係咁鍾意去主題公園和玩機動遊戲。人生已經夠殘酷和驚嚇了,我唔需要再找尋刺激了,而且這些刺激是有安全帶的,何苦呢?唔扣安全帶玩跳樓機過山車就唔同。

實不雙暪,幾年前我甚至曾經熟讀過一篇文章講解如何令小孩不要愛上主題公園,有興趣的朋友可以自己搵下。

咁點解而家又買年票又住酒店?


阿仔和翠絲
阿仔勁鍾意翠絲

好簡單,當你見到個仔去到見到喜歡的卡通人物活靈活現出現係面前,表現得咁鬼開心,就會覺得係值得去。其實阿仔明知佢哋係假扮,仲會諗佢哋係頭套下面點睇野,但見到那些原本只在圖書或電視見到的卡通人物,確係好開心既。

其實我去到見到班白兵行來行去或者同巴斯光年都好開心,好鬼充滿童真。

好彩阿仔無同我講為左追求刺激...

咁貴,無錢點算?


其實而家好多商場都有好多免費節目有卡通人物,阿仔近月好鍾意公主,屯門最大那個商場早排便有公主展覽。免費入場,有好多個公主佈置俾人影相,仲有互動遊戲,阿仔都一樣玩得好開心。

阿仔與貝兒
其實阿仔未睇過《美女與野獸》

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

19 則留言:

  1. 我未帶過小朋友去廸廸尼,一來覺得貴唔值,二來自己唔迷卡通人物,亦唔想小朋友迷上,放假去下不同有特色既公園遊樂場就夠玩。

    回覆刪除
    回覆
    1. 我自己本身都迷唔少公仔,屋企好多星戰和one piece公仔,好難叫阿仔唔學,哈哈哈

      都曾經堅持左一排唔去主題公園,後來睇化左就無咩所謂了

      香港確實有唔少有特色的公園,九龍東便有化石公園和恐龍公園,港島又有消防船,新界西又有森而兄都介紹過的爬蟲館和百鳥塔,其實都好夠玩。

      刪除
  2. “阿仔近月好鍾意公主”

    Mike兄囝囝咁細個就識冧靚女姐姐,好眼光😅👍

    回覆刪除
    回覆
    1. 異性相吸丫嘛,睇史力加佢都係鍾意費安娜

      刪除
  3. 公主展覽完左未? 我家個姣妹一定好想去。

    回覆刪除
    回覆
    1. 一月頭完左啦,而家係風雲,同細仔一齊去扮步驚雲啦

      刪除
  4. 小朋友細個時多數會鍾意迪士尼,大啲(身高過左130cm)就會鍾意海洋公園。

    回覆刪除
    回覆
    1. 因為大個左鍾意玩機動遊戲?

      不過我真係由細到大都唔鍾意玩

      刪除
  5. 香港最近開了鐵甲奇俠飛行之旅,有無試過?

    回覆刪除
    回覆
    1. 無呀,我唔鍾意玩機動遊戲,阿仔又淨係鍾意睇表演,遲下先試

      刪除
  6. 開心! 小朋友都喜歡迪士尼!

    回覆刪除
    回覆
    1. 的確係一個令佢哋好開心的地方

      不過都認識一些小朋友係唔鍾意架

      刪除
  7. 拆左射槍個巴士光年遊戲我真係好傷心
    呢個係成個park入面唯一好玩既野 :(

    回覆刪除
    回覆
    1. 仲有巴斯光年射槍呀,無左追尾賽車咋

      話時話,我一向都覺得個射擊遊戲計少分,哈

      刪除
  8. btt以前我係入面做partime個陣, d死仔包問我拎貼紙
    成日嫌三嫌四,剩係要史迪仔胡迪個類
    我話我比d靚女相(ie公主貼紙)你, 你大個左就會明, 但個個都say no
    好似令公子咁細細個就咁識貨既, 真係買少見少

    回覆刪除
    回覆
    1. 哈哈哈,乜可以換既咩?我個仔俾咩貼紙都要,不過拎到返屋企之後都係變廢紙

      識揀靚女呢樣野,好明顯係似老豆啦

      刪除
  9. 塘人而家都好有童真, 最好俾D扮卡通人物既姐姐攬下咀下XD

    回覆刪除
    回覆
    1. 可能其實係男人扮架...

      又見到真樣個D公主唔會攬人

      刪除