好老婆萬事足

今朝一早睇到七十後兄篇〈一生中最明智決定　金錢？愛情？自由？〉，實在精彩，我唔係度爆甚麼是七十後兄的一生最明智決定，建議大家自己去睇（仲有閃卡），不過我就忍唔住要回應一下娶個好老婆有幾咁重要。

娶個好老婆，有事時可以一齊商量，有問題時會信任你和支持你。最重要是讓你知道，身邊有個人可以讓你放下戒心，舒服地係埋一齊，唔駛理會外邊世界的風風雨雨。

以上既野，我曾經真心以為係必然，原來事實唔係

試過有一次係街等外賣，身邊有個三人家庭，老婆同個女就好似食左屎咁既樣，無論個男人講咩，兩位女士都係黑口黑面咁回應一句，冷言冷語，掘雷槌，無尾音，總知就係擺到明唔想同你講野既模樣。如果呢個家庭平時都係咁樣，我真係唔知個男人點過（其實我覺得呢種屋企無地位既男人先最容易有外遇，俾錢買個種）。

可能你會覺得這些是極端例子，可能啦，不過我真係覺得愈來愈多，係街上面和車上面都見唔少。呢種相處方式，其實係受罪，男女雙方都係。

曾經睇過一本書，叫做《日本貴婦都在做，讓老公變有錢的64個習慣》（讀後感有此），當中有一點是指妻子在婚後甚至產子後都應該保持可愛。當時我覺得可能日本文化比較男尊女卑才會有這種諗法，所以對這點不以為然，後來卻愈來愈認同。我認同的並不是那種低能的扮可愛，而是一種開放的心態，對另一半保持興趣，開開心心地面對大家，我諗無人鍾意返到屋企對住個黑口黑面的另一半掛。

可愛，自然有人愛

當然係人都會有遇上不如意事情的時候，每個月亦都有唔方便個幾日，無可能要求日日都笑面迎人，但總唔好一日到黑都死老豆咁既樣，真係睇見都無心機。

其實我唔係針對女士，男士都係一樣。成日都黑口黑面對住老婆，老婆有心事都唔會同你講，最後佢搵第個傾，傾到唔知去左邊度，你唔好怪佢。

講下我自己，老婆一向都自稱唔係可愛型，佢會笑住咁話〝唔駛旨意我扮可愛〞，不過我認為有D野係唔駛扮既，哈哈哈。基本上有咩事我地都會商量，好多時佢亦都好支持我，我相信佢應該唔係盲目支持既，因為佢知道我係傻既。

等我都放下閃先，七年前既相。

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。