父與子

有時候我對我個仔真係好惡，惡到自己諗番都會覺得好得人驚。早幾日有單新聞，有個老豆罰自己個仔跪低過馬路，我睇完的第一個感覺係好怕，怕自己有一日都會咁做，我覺得我自己真係會咁做。

除左惡，另一個更大的問題是我的負面情緒。好多時俾個仔激親，都會衝口而出講好多晦氣說話，講完自己都會好後悔。

其實，佢而家只係得三歲半‧‧‧

有時一些早已忘記的事情，他會在事隔一排後突然提起，並且可以清楚重提當中的細節。我相信父母的說話是深深刻在他的心內，當然也包括了我那些惡言惡相和晦氣說話。只是可能他未能立即理解，便把整件事情深深記入腦內。

我從不幻想自己成為阿仔心目中最愛的人，亦認為他任何時候都應該將勞苦功高的媽媽放在第一位，但事實上我距離第一位的位置已經愈來愈遠。

阿女出左世就快四個月，阿仔一直都非常合作，從未為了自己的照顧及注意被分薄而投訴。只是無可否認他比以往多了為小事發脾氣或很容易便生事，而我這個EQ極低的爸爸，總是很輕易便被他的惡行搞到火上心頭。

話說我在年尾辭職，一家四口的唯一收入來源玩裸辭，原因當然有很多。其中之一便是希望在阿女初初出世的這幾個月，多些時間陪伴阿仔去和他一起面對和適應這轉變。以目前來看，陪伴他的時間確實是多了很多，有很多次我們二人同遊的經歷，當中也有很多快樂的時光，但很多時總是在最後關頭因為一些小事而變得不快，難免有一些功虧一簣的感覺。

阿仔好似我，外表似，動作神態都似，連喜歡搞事去引人注目都似。其實，我應該知道他搞事的目的。其實，我應該知道如果妥善處理。我做父親的資歷是三年半，而他做哥哥的資歷只有三個半月，我應該可以做得較好。

要改，要改，真係要改

希望有一日，我都可以好似呢對杯咁，笑住咁面對，爸爸應該要包容

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。