賺取銀行推廣獎賞

幾星期之前寫了一篇文章講如何在網上分享廣告賺錢，最後提到自己都係比較鍾意玩銀行開戶優惠賺錢。反正已經提到，不如再寫清楚少少，我試過的銀行推廣主要有以下三類。不過這些都是蠅頭小利，講緊最多都係千零蚊。只係因為接近零成本，花的時間主要在開戶，之後的跟進並不多，所以半桶水爸爸自己覺得也是不錯的活動。

Embed from Getty Images

1. 開新戶口

顧名思義，這就是指全新客戶去一間銀行開立戶口並存入指定金額，有些銀行可能會需要進行某些指定交易或服務才能得到現金回贈，回贈金額亦會因為不同情況而不同，數目一般最多都只是數百元。

半桶水爸爸係2015年試過一間英資銀行，該推廣不設最低存款金額，但需要每月進行一次網上交易，網上交易包括網上轉賬，當時我便連續大約半年每月將一百蚊在該行的儲蓄戶口和往來戶口之間轉來轉去，賺取數百元獎賞﹝忘記了是三百還是五百﹞，回報率極高。

2. 出糧戶口

唔知幾時開始，幾乎間間銀行都在做出糧戶口優惠，從中可看到不同銀行之間的包容度。所謂出糧戶口，就係將閣下在公司的出糧戶口轉至該銀行，在某段限期內每月將薪金存入該戶口，銀行便給予閣下一些回贈和優惠。部份銀行的包容度很高，由其他銀行使用常行指示(Standing Instruction)的轉賬也可以當成薪金。更甚的是有些銀行願意提供現金券去補償閣下在其他銀行定立常行指示的手續費，讓你真正做到零成本。

這種玩法基本上是不斷重覆玩同一舊錢，今日過數明天便可以提走，但要注意在戶口保留該銀行所要求的最低存款金額，否則可能得不償失。

提走資金方面，最方便及低成本的方法是寫支票。如果該銀行支援發出電子支票更佳，不用每月親身入票。

半桶水爸爸試過一間美資一間中資銀行，美資那間當時的推廣真是無敵，玩一年幾樣野加埋接近拿了兩千元。

3. 推薦朋友

就係現有客戶推薦朋友去開戶口及該朋友完成指定交易或服務咁簡單，獎賞大小視乎該朋友放幾多錢和你成功推薦到幾多朋友，一般設有上限，未到之前算係多勞多得。

半桶水爸爸試過一間美資一間中資銀行﹝就係玩出糧戶口個兩間﹞，無咩特別可言，食個下午茶就無左。

注意事項

請緊記中出即飛，除非你當佢係真愛。Sorry，應該話係除非你好享受該銀行的服務，否則完成後應盡早將所有戶口取消，等待過冷河之後再玩過。冷河期一般係半年或一年，之後又係新客。

講到尾，銀行唔係善堂，唔會無端端派錢。你的成本除了開戶口和每月搬錢的時間之外，你的個人資料也是全部俾哂銀行。如果你懶或者你真係好鍾意該銀行既服務，該銀行亦變相多了一個長期客戶，仲未計你中途可能買了大大小小的理財產品。

相關文章

• 網上分享廣告賺錢體驗
  

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed追蹤半桶水爸爸。