2018年11月17日 星期六

借稅貸賺息差?當儲錢算啦

幾年前我曾經借過一筆稅貸去做投資,玩左兩年,戰敗收場。當時我話借稅貸買定息產品較穩妥,但我自己一直無咁做。近期連續有幾個朋友都提到呢樣野,流於吹水階段,無真實數據,我便親身計下,睇下實際回報如何。


稅貸,其實只是銀行利用交稅這個名目創造出來的貸款產品,和交稅的金額沒有很大關係。稅貸特點是年期只有一至兩年,利率比私人循環貸款低,貸款額亦也不會很大,例子如下(留意以下所有存款及貸款利率皆為虛構,唔好問我邊度搵):

借款十萬,年利率1.5厘,借一年分十二期還,每月還款$8,401。

好了,大家都說借錢賺息差,講得很輕鬆,但實際上邊度搵到一種高息產品係可以俾你每月減少本金拎去還錢架?每月重新開立一個月定期?一個月定期很低息呢。每月派息的基金?有價格風險呀。我只係諗到mortgage link存款,但首先你要有層樓。

先假設真係有吧,利率2.3厘,本金十萬,每月計息及提款$8,401,結果如下圖:


一年後還清貸款,剩餘四百四十大元,年回報0.4厘。

憑空生成0.4厘回報,值唔值得視乎你點諗,落銀行申請搞一兩粒鐘,之後應該全自動。另類咁諗,有借有還應該對你提升個人信貸評級有幫助。

好似標題咁講,我認為利用稅貸去儲錢效果更佳。

是咁的,假如你可以每月儲蓄$8,401,這樣便可以利用稅貸先借十萬去造一個簡單的一年定期,然後每月利用儲蓄去還錢。

假設定期利息同樣是2.3厘,一年後連本帶利收回$102,300,減去一年來的還款$100,812,得到$1,488,年回報1.4厘。

以上方法和傳統的零存整付有咩分別?分別在於以上方法是從一開始便拿著十足本金去收息,而唔係每個月增加本金,分別不少呢。

借用中國銀行的計算機,年利率1.4厘的零存整付,月儲$8,401,一年後可以拿回$101,576,減去一年來的供款$100,812,實際上只是拿多了$764,年回報只有0.7厘。


講到尾,自己計清楚,還得到先好借。

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

這是你的第一次到訪嗎?由這裡開始認識我們吧。

想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

Related Posts Plugin for WordPress, Blogger...

22 則留言:

  1. 沙發~ 稅貸既用途用來俾人練習儲蓄守下紀律都唔錯既
    不過現金流有錯配既問題又係一般人容易迷失既地方

    回覆刪除
    回覆
    1. 多謝捧場,係我呢度D要沙發難度好低架咋。。。

      我覺得先要有紀律,加上肯定自己有能力還,先至好借稅貸去儲錢。。。

      刪除
  2. 借貸息率兩厘以下需要大額借貸,能做到大額借貸的人大概也不一定要稅貸了(忽發奇想,有能力隨手借個十億的人,銀行當花四百萬拉客��)。不過,重點是憑空生成,這種無風險套戥,確實是很重要的觀念,感謝分享。

    以一年為終點,除了定期,也真的比較難在身邊留意到類似物品。

    T

    回覆刪除
    回覆
    1. T你好,隨手借十借既條款應該唔會公開俾普通人知道,應該係銀行度身訂造既產品了。

      我都諗唔到有咩選擇,只係身邊好多人話賺息差,我就唔知有咩產品可以咁樣月月提走本金。

      刪除
  3. Mike兄這篇說出重點了,還息還本之貸款好難賺息差,會有Cashflow mismatch問題。

    回覆刪除
    回覆
    1. 無錯!照計借得多賺得多,但借得多還得多帶來嘅Cashflow mismatch就麻煩啲。不過,我做有信用卡達人blogger可以提供一個方法去避LOL

      刪除
    2. 風兄,小弟寫左幾年,終出有一篇說出了重點,很感動。。。

      Michael,係咪避一兩個月?

      刪除
    3. 計到盡可能有三至四個月

      刪除
    4. 利害。。。信用卡達人果然勁

      刪除
    5. Mike兄篇篇文都寫出重點,不是只有這一篇啦,哈哈。

      刪除
    6. 哈哈哈,風兄,多謝捧場

      刪除
  4. 我看網上也有類似的說法。

    https://starpnews.com/blog/利用樓宇按揭產出現金流/

    回覆刪除
    回覆
    1. 我們連發佈的時間也差不多。。。如這位作者所說,年期長短正是稅貸和樓按的重大分別。

      刪除
  5. Mike兄,聞說有某銀行給予低於2%的稅貸息率,若果閣下有MORTGAGE LINK戶口,除神PLAN外,一般息率會高過2%,這樣理論上可以產生無(乜)風險套利行為。比如利差有0.3%,借100萬稅貸放回MORTGAGE LINK,理論上就有最多3000大元... 當然,稅貸要每月還本,所以實際回報要減半。哈哈!即係攪咁大場大龍鳳,得1500大元,似乎得啖笑呢...

    回覆刪除
    回覆
    1. 你呢個例子仲慘過我上面寫回報0.4厘

      刪除
    2. 現實好殘酷...邊有咁著數,無風險套利呢。呵呵!

      刪除
    3. 無錯無錯。。。特別係呢種好多人講,但實際無咩人真係做既野。。。

      刪除
  6. 做一場大龍鳳,如果真的零成本賺到一千幾百還說得過去,但其實借税貸最大的成本是嚴重影響(按揭)借貸力。在樓市下行時間,還是多保留實力準備出擊更實際。Pound Wise, Penny Foolish.

    回覆刪除
    回覆
    1. 絕對係。有低市價一兩球的極品,無借貸力都執唔到。

      刪除
    2. 兩位也說出了重點,稅貸年期低,縱使借款不大,但每月還款卻不少,這大大影響了壓力測試。

      刪除
  7. UA有一個0息借貸
    分期貸款產品資料概要:

    還款期最短為6個月及最長為12個月。
    實際年利率最高為0厘。
    簡述貸款有關費用如下以作參考:
    – 貸款額:HK$10,000
    – 10個月之分期貸款,每月還款額為HK$1,000
    – 利率:月息0%
    – 實際年利率:0%
    – 總還款額:HK$10,000

    用第1種方法可無本生利,而不失定期月供股票的機會成本

    回覆刪除