唔夠時間？定係唔夠決心？

呢本《卡拉馬助夫兄弟們》，大大話話我睇左接近半年都重未睇完，圖書館續借都借到爆限額要還左再借番。其實千零頁書唔應該要睇咁耐，早兩年睇《龍紋身》千禧三部曲加埋都唔駛花咁長時間，用了這麼多時間，主要原因有兩個。

第一是這本書太厚太重，帶佢出街簡直係自討苦吃，而我的黃金讀書時間正是返工放工的搭車時間，如果可以分上下兩冊甚至上中下三冊會方便很多。

第二是這書太多關於道德和宗教的爭論，我唔清楚那個年代的俄國人民是否真的這麼喜歡討論神，但每當我在深夜時份讀到這些部份，也倍感疲勞，眼睛一合上便進入夢鄉。

我自己好清楚，唯一不可當成籍口的是不夠時間。試想下自己在家中無無謂謂浪費了的時間，用那些時間睇幾多書都得。偏偏自己就係拎住部電話睇那些其實唔駛追得咁緊既網上財經新聞，看那些其實唔係咁好睇既電視節目。

我重好記得，四年前既一次朋友聚會，談到新一年的目標﹝呢個情節老土到無人信﹞，我提到我既目標係睇多D俄國文學，《罪與罰》和《卡拉馬助夫兄弟們》正是我當時的最終目標，數年間也看了幾本較短的作品，《罪與罰》舊年睇左，今年終於下定決心挑戰《卡拉馬助夫兄弟們》，睇左小半已經知道自己功力不足，最多只能做到了解劇情，當中那些充滿深度的討論，對我實在太深奧。但係無所謂，已經捱到最後一部，重差百零頁，點都頂埋佢。今次睇唔明，過幾年再挑戰過。