射倉慳存倉費兼賺優惠和享高息存款

上次提到離開舊公司要買醫療保險，其實舊公司的福利實在太多太好，但一切已成過去，好多野都要自己諗下點去填補，詳情可參考離職福利補完計劃的文章。

舊公司其中一樣福利就係免除一些股票投資的雜費，小數怕長計，有得慳就慳。另外因為舊公司係一間銀行，在其他銀行或證券行開投資户口要申請許可證，所以一直都怕煩無試過其他地方的投資户口，現在有機會便立即試下外面的世界，今篇文章便講下我射倉慳錢賺優惠的經過。

某美資銀行

慳返存倉費夠買蛋糕

舊公司提供員工免存倉費和免代收股息手續費的福利，正常收費是每月存倉費廿五蚊和股息金額的0.5%。其實數目唔大，但一向唔駛俾就真係唔想俾。存倉費一年要三百蚊，加多少少夠係帝苑酒店買個生日蛋糕俾自己，有得慳點解唔慳？

近年不少銀行都積極搶客，某美資銀行不單免存倉費和免股票存入費，更提供股票存入回贈，存入的股票市值愈大，回贈的金額便愈多。另外銀行亦根據存入股票的市值，提供一個兩個月有效的年利率三厘儲蓄户口，比現時按揭掛鈎存款的利率高一厘有多。

射倉三部曲

講番射倉過程，第一件事便是在該美資銀行開立股票户口，全部網上搞掂。但估唔到我竟然會遇上系統故障，搞到要申請兩次，最後兩個多星期才順利開户。

第二件事便是通知現在的銀行，告知他們我的轉倉要求和對家銀行的資料（CCASS號碼、銀行名稱和户口號碼），這需要親身落分行搞，職員填表然後我核對資料簽名。唔計排隊等候時間，需時大約20分鐘。收費方面，每手股票收費五蚊雞，最低收費每隻三十蚊。以我自己為例，手上七隻股票加埋有八十手，當中有兩隻唔夠六手要俾最低收費，便總共需要$420。基本上回贈只夠剛好抵銷這支出，但幸好還有那兩個月三厘存款户口。

第三個步驟是在新的存倉銀行登記，這間銀行提供網上辦理提取及存入股票，操作甚簡單，同樣地只需填入對家銀行的資料及股票數量便可以，稍嫌奇怪是每次最多加三隻股票，我有七隻股票便需按三次。

結果等了三個工作天（星期五上午在舊銀行做，星期二晚上在新銀行見到），便在新銀行看見那些股票，大功告成，那些回贈和存款利息便要一段時間後才會收到。

大家有無試過射倉賺這些濕碎錢？有無特別經驗分享？

---------------------------------------------------------------------------------------------------------

如果想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。