我有今日

一早起身去跑步，拉筋的時候望下網上新聞，標普500和道指急跌蒸發全年升幅，納指破七年單日最大跌幅。然後加埋恒指日瀉數百點，騰訊不斷破底，匯控被橋水沽空一億股。世界末日到了麼？

未到既，要跌仲有好多空間去跌，反彈隨時有（只係偏偏港股無），錢財身外物，太著緊反而累事。

作為一個人類，如果經常需要以身家、收入和權力來刷存在感和令自己快樂，可能有人鍾意呢種方式，我自己就唔係咁接受呢一套。

四大長老身體健康，老婆活得開心自在，子女健康快樂成長，我覺得這些比甚麼都重要。

阿仔下年升小學，我們替他選擇了四間直資小學，第一輪面試全部也完成了，最後結果係點仲未知。基本上那些說面試不重視學術的都是空話，看來乖乖坐定定講英文才是“那種地方”的成功之道。

老婆講得好，如果真係要入這些學校，一開始便不應該讓孩子進入標榜開心快樂的幼稚園，阿仔而家果間仲要被喻為區內最開心。

反正我們一秒也沒有後悔過。

回到幾年前阿仔返學之前，我們希望孩子愛上學習，知道怎樣和別人相處過群體生活。這些希望現在都是超額完成。

其實孩子係邊度返學都好，都是很大程度在走別人安排的路，最重要和最需要的能力應該是走出自己的路吧。學術甚麼的，平安過渡便可以，反正拿A的都是為拿C的打工。

阿女剛剛足兩歲，返左一個多星期兩歲班，暫時都係喊住返學笑住放學，平時問佢都話學校好玩同埋鍾意返學，就係每日都唔捨得離別，希望早點適應啦。

十一月開始便是阿女面試幼稚園，最想當然係阿哥而家果間，但競爭極度激烈。

而家兩兄妹愈來愈多一齊玩，雖然順帶爭執都多左，但這是必經之路，反正都是培養他們相處之道。

下個月會同阿仔去親子旅行，一大班K3學生同埋佢哋既爸爸去體驗生活五日，學校講明係辛苦，媽媽們表示極度擔心，爸爸好似未識驚，不過會好掛住老婆同囡囡。

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

這是你的第一次到訪嗎？由這裡開始認識我們吧。

想最快睇到我的新文章，請Like半桶水爸爸的Facebook專頁或以RSS feed和Email接收半桶水爸爸最新文章。