2018年7月9日 星期一

是否推薦香港年金計劃俾四大長老?

講左一年有多,香港政府終於正式推出香港年金計劃的詳情及於七月十九日開始接受市民提交申請認購意向。

近兩星期的報紙都有不少篇幅談及香港年金計劃,但我認為最詳細清楚的便是香港年金計劃的官方宣傳小冊子,非常值得有興趣的朋友細讀一下。

政府和天王背書的香港年金計劃﹝相片摘自蘋果即時新聞﹞
政府和天王背書的香港年金計劃﹝相片摘自蘋果即時新聞﹞

我屬於幸運的一群,四大長老俱在,所以我一向都好留意政府的長者政策。加上政府提供給市民的財經類產物,遠至盈富基金,近至銀色債券,都往績良好,當中ibond和銀色債券都甚有派錢的味道。所以我也花了一點時間去看看這個香港年金計劃是否值得推荐給四大長老。

好簡單咁講,年金計劃是保險的一種,不是投資,著眼點應該是固定的收入和派發期。

由投保開始,香港年金有限公司﹝背後是屬於香港政府的香港按揭證券有限公司﹞便保證向投保人每月派發年金,年金金額根據投保人的年齡和性別來決定。派發的有效期有點複雜,下面會舉例講。以下兩個表係年金金額,摘自官方宣傳小冊子



首先大家要知道咩係保證期,保證期即是由一開始直至每月收取的年金金額累積到投保金額的105%為止。假設一個六十五歲的男子,名為陳生,投保一百萬,105%便是一百零五萬,而根據香港年金計劃,投保一百萬的六十五歲男子的每月派發年金為$5,800,保證期便是一百八十二個月,我們簡單地當成十五年吧,即陳生八十歲的時候。

情況一,陳生在八十歲前退保,即退出香港年金計劃。因為保證期未完,佢可以取回保單內的保證現金價值,有﹝很大﹞機會少於當初投保的金額,造成損失。

情況二,陳生在八十歲後退保,因為保證期已結束,一分錢也不可以取回。

情況三,陳生一直都無退保和長命過八十歲,咁佢可以一直收取每月$5,800直至過身,愈長命就累積愈多。

情況四,陳生一直都無退保但在八十歲前過身,因為保證期未完,佢既指定受益人有兩個選擇。第一個選擇係收取每月$5,800直至保證期結束,即投保人冥壽八十歲。第二個選擇係一筆過收取身故賠償,金額和情況一相同。

唔該哂陳生先。

香港年金計劃的兩大超級優點分別係擁有香港政府的背書和終身收取年金的特性,香港政府的信貸評級比絕大部份保險公司優勝,一般保險公司的年金計劃大多不會終身派發,例如只派到八十歲。單是以上這兩點,已經足以讓香港年金計劃賣得比別人貴,即是提供較低的每月年金,但事實卻並非如此。

香港年金計劃提供的內部回報率為四厘,老實講,這個回報率高得讓我這個納稅人擔心香港政府一班財金官員會否過份樂觀?香港按揭證券有限公司近年當然賺錢賺到手軟,但十年八年後年市情況係點無人知,只怕到時變為政府的一大財政負擔!

個人建議,可以用閒錢買,閒錢既定義係有重病都唔駛用得著既錢,畢竟中途退保多數蝕。唔負責任咁講,如果認為自己仲有好長命既,可以進取少少咁買。

關於情況四,投保既老友記最好同家人講清楚點揀,始終兩個選擇都唔見得係好。

無後輩或無需要保留財產給下一代的人士,大可以將這計劃和安老按揭共同使用,死前花光每一分一豪,其實幾爽。

另外很多報道都提到一點,就是長者生活津貼的考慮,香港年金計劃的投保額,即係上面陳生果一球,並不會計入長者生活津貼的資產限制,但每月收取的五千幾蚊便會計算在內。我個人認為唔值得為左拎長者生活津貼而刻意將資金投入香港年金計劃,重申一次,中途退保多數蝕。

最後再講一次,年金計劃是保險的一種,不是投資,無論任何情況,將保險和投資混為一談,都是危險的做法。

坊間好多人將香港年金計劃的內部回報率和股票投資作比較,這絕對是錯誤的對比,兩種產品在性質、風險和穩定性上完全不同。某報專欄甚至提供了一個百萬年金高息股組合,將十多隻業務穩定和高息的股票以足球隊的型式推薦給讀者,老實咁講,以投資角度去睇,我很喜歡這個投資組合,雖然是跟風,但以足球隊來介紹不同股票在組合內的功能亦確實是簡單易明。但可惜一開始我便不認同這種比較的意義。

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

這是你的第一次到訪嗎?由這裡開始認識我們吧。

想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

Related Posts Plugin for WordPress, Blogger...

23 則留言:

  1. 我都有睇該專欄,都幾好睇易明。但我唔會叫我屋企老人家跟買呢d收息股,因為隨時比中海油、金沙等股票嚇死

    回覆刪除
    回覆
    1. 哈哈哈,我諗視乎投資者自己性格同投入程度,始終要揸十多隻股票,平時唔可以完全放低唔理,對興趣不大既人黎講,需要花既心力都唔少。不過始終佢係牛頭唔搭馬咀,年金同投資無得比較。

      刪除
  2. 多謝師兄詳細解釋, 最鐘意你果句「唔該哂陳生先」。

    回覆刪除
    回覆
    1. 上網睇D COMMENT, 大部份都唔睇好。
      一黎好似師兄咁講, 好多時都會將「投資」同「年金」拉埋一齊講, 香港人個個都識投資, 5%既投資回報率唔難 (載番個頭盔先, 唔係我講緊, 睇下面條 YOUTUBE LINK)。
      二黎「年金」同通脹唔掛鉤。
      三黎好多時D人都會用呢個年金計劃同「全民退休保障」及「退休後生活保障」拉埋一齊講。

      二當家覺得, 政府推出呢個「年金」只係提供多一個選擇俾中產長者, 如果一個長者得一百萬, 斷估唔會ALL IN 掛。就算你買盡一百萬, 每月都係得5千蚊, 以今日既指數叫夠買餸食飯, 咁10年後呢? 所以如果當呢個年金計劃係退休後既生活保障係不切實際既。

      至於政府包底既回報, 我反而唔咁係擔心, 因為始終規模有限, 同埋要全數買入既長者都有咁長命至係>4%, (假設80歲IRR約1%), 假設中途退出只係收得番7成, 拉上補下, 我估唔駛貼太多。

      至於真係會買「年金」既人, 都係有閒錢既老人家, 問題係點解政府要搞呢單野呢? 個受益眾係邊個呢? 點解唔係扶貧而搞一個中產家庭至考慮既年金計劃?

      我同意福兄所講,政府搞呢單野都係取代保守投資配置部份, 減低市場波動既風險。但社會上都普遍希望政府優先幫助貧窮人士, 而非幫助中產家庭既資產配置。 而且香港人會投資既比例極高, 市面亦有好多公營/公共服務既上市公司提供不錯的回報可供選擇, 明推一個得不到掌聲既計劃, 二當家都摸不著頭腦。

      https://www.youtube.com/watch?v=wiQN63Leyv0

      刪除
    2. 長者生活津貼算唔算幫到貧窮階層的長者??

      刪除
    3. 同意二當家講政府推出呢個「年金」只係提供多一個選擇俾中產長者,正如我話只可以用閒錢買,普通人邊有幾十萬閒錢。

      刪除
  3. 絕對同意半桶水爸爸的分析,公共年金應該用來取代保守投資配置的部分,不應該跟股票比較也不應該是資配的全部/大部分。

    公共年金的回報由政府包底,所以應該跟鎖定期較長但保證回報的政府債券比較。4厘保證回報,現市況來說真的多長的政府債券 / 銀髮債也做不到。

    一般保險公司更加不會開這個盤,保證回報的風險資本成本(Risk abased Capital)高得不能相信。加上要付經紀佣金,保險公司保證加非保證回報有 4厘已經不錯了。

    回覆刪除
    回覆
    1. 多謝福祿壽全兄的補充

      我認為今次都算係派錢,不過門檻較高,普通家庭未必有呢個閒錢

      刪除
  4. 感謝師兄詳細分析。小弟多年有個心得,就是香港政府賣得出來的東西絕大部份是好野。港鐵、領展、IBOND(尤其係首次全民唱淡那批)、居屋、公屋,數不勝數。而且傳媒越唱淡越要買,因為政客最終實幫小市民爭取到一個神雕。所以當細節出台,肯定不只4% 內部回報率。受害的從來都是納稅人。所以小弟一定幫長者買返些少,以彌補納稅時被割肉的苦況。

    回覆刪除
    回覆
    1. 曲到圓咁講,政府總是為左市民好,哈哈哈,事實係政客要為自己加分,成績表上面要有野寫,反正埋單既唔係自己。

      刪除
  5. 謝謝半爸兄,小弟受教了����,的確投資和保險應該分開看,和投資混為一談的確很危險,看來小弟還是有不好的習慣常常用回報來看計劃,雖也知道保險和投資要分開,也已經是買定壽和盡量沒有投資成份的保險計劃,但一看這年金又回到以前的劣根性。。。發表了一些自己也不正確的及沒意義的比較觀念。
    好在有這平台,有師兄的提點。歡迎(甚至希望)各位師兄師姐多點來指點小弟,畢竟小弟學習投資資力還淺,只是正在從心態開始學習著。������

    回覆刪除
    回覆
    1. AC兄太客氣了,大家都是互相學習。政府自己宣傳都講回報率,難免引起大家拿來和投資比較。

      政府當年用ibond賣大包推廣債券,但效果一般,今次睇下會否引到其他保險公司推出更好的年金產品,搞旺年金市場。。。雖然我認為機會很細。。。

      刪除
  6. 陳生好幫得手。
    網上一片罵聲,證明一般人還是不理性的,總是將蘋果與橙比較。一個風險與定存一樣低的保險產品,給予四厘回報,天底下到哪裏去找?

    回覆刪除
    回覆
    1. 我想講陳生其實叫阿波。。。

      大家咁鍾意比較回報率,某程度同傳媒重點報導四厘內部回報率有關,政府官網其實唔覺有重點去提呢樣野。

      刪除
    2. 因為4厘回報係講緊20年,唔係依家短咗一大截的保證期.

      刪除
    3. 魔兄真係心水清,計算呢個內部回報率用既年期係長過保證期,無記錯係廿年,即係陳生八十五歲個陣。

      刪除
  7. 如果已經有自住樓,仔女無本事俾家用,而自己又有百零萬的話買晒佢(留二三十萬旁身)都唔錯。計埋本來因為資產無資格拎的長者生活津貼(跟通漲調整!),每月可以拎到七千幾八千蚊,咁計的話回報率相當不錯。

    又,如果仔女識少少投資又信得過的話,俾舊錢佢地然後叫仔女當年金咁俾返自己都可以吖。

    回覆刪除
    回覆
    1. 你講得啱呀,月月有錢真係收感覺良好架

      至於搵仔女投資,如果有多過一個仔女,好多時都會產生很多猜測懷疑,情況會變得複雜呢

      刪除
  8. 小心D 4%回報的計法
    https://abcoldman.blogspot.com/2018/07/blog-post.html

    回覆刪除
    回覆
    1. 多謝分享

      所以我還是認為不要太在意這個IRR。

      刪除
  9. 認清保險本質,而非投資...謝謝分享

    回覆刪除
    回覆
    1. 別客氣。我都係自己研究完順便分享埋。如果有人當年金係投資,然後使用備用資金或投資用資金買入,其實係一件好危險既事。

      刪除