2017年7月20日 星期四

機械表之初體驗

有一日和同事吹水,講起某出名不事生產的高層,無知又好奇的我拋出一個問題,到底呢種高層,當初是如何上位的,老實講我好佩服。

同事間有不同的猜測,但我老闆的一句說話,令我印象深刻。

“行頭真係好緊要,睇佢平時同人開會,坐係度show一show手上隻介指同隻表,人地就知佢猛料,之後講句野都大聲D”

呢隻手係我既

當時我心諗,咪又係表一隻,42萬個隻撈都係著去踢波,又唔係江詩丹頓,老老實實我就覺得載Panerai有型得多。

但無論如何,經過呢次吹水,我覺得為左我既事業,我真係要考慮下提升自己既行頭。

再好老實咁講,雖然勞力是無止境,意頭似乎唔係咁好,但我舊年睇到黑圈白面Daytona (Ref.116500LN)在巴素爾表展面世時,確實是心動了。當時甚至稍為研究了如何可以一手買入,但因為距離正式推出尚有一段時間,加上準備裸辭,加上阿女就快出世,加上無數個自己俾自己既理由,最後當然咩都無買到。

然後可能係命運既安排,在緊隨那次吹水之後,老婆有一日話既然我有一隻表已經唔再載(因為49/120分的精神分裂症所造成的迷信),不如送隻新既俾我。

我心諗,唔係咁爽呀?!

當晚,在老婆仔女都訓哂覺既深夜,我在梳化拿著手機,研究了一下這些名表的行情。

Daytona (Ref.116500LN)

最後,反高潮地,我還是放棄了這些五、六位數字的名錶。反而對一些日本牌子的機械表產生了興趣。

最初睇中既一隻,是精工的SRQ019J1,點知原來係限量版同埋都要五位數字。後來轉為看上另一隻也是以精工在1913生產的第一隻腕表Laurel為藍本設計的SPB041J1。

這隻SPB041J1使用精工自家製機芯6R27,表盤上有一個動力計顯示剩餘的能量,適合好似我呢種第一次玩機械表的低能仔。除了擁有「紅12」的標記之外,錶上的三支指針亦很特別。三支指針平時是黑色的,在特定角度便會看到藍色。

咁大個人先知道機械表原來無石英表咁準,誤差以日為計算,即係每日都會誤差一兩秒咁。我自然很好奇地每日都去天文台對好多次表,睇下表現如何。

至於事業既野,我都係做番一個低調既(扮有)實力派算吧。

都係睇相最實際。





---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

19 則留言:

  1. 我以前對撈都有一份迷戀, 覚得有隻撈出黎開會都型。不過而家人大左覚得咪又係錶一隻, 戴出黎又怕比人偷又怕比人搶, 而且要錫住戴, 最重要係有誤差 --> 唔 "準", 所以都係石英錶好!

    回覆刪除
    回覆
    1. 好似誠哥咁,邊駛靠隻錶,用太陽能石英錶,又型又準又環保

      刪除
  2. 想低調又有型, 可以考慮下 GRAND SEIKO, 不過都唔平
    番工坐地鐵見到個個都有隻「撈」, 香港人真係有錢

    回覆刪除
    回覆
    1. 坐地鐵真係見到好多人載撈,後生仔女都唔少,唔知係青年才俊,定係窮得只有錢

      GS我都有睇過,絕對係低調型格之選。

      刪除
  3. //機械表之初體驗

    我第一隻機械錶係中學時代在CC買的司馬,自此以後就只會戴機械錶了:
    http://magician__yang.mysinablog.com/index.php?op=ViewArticle&articleId=960882

    //老老實實我就覺得載Panerai有型得多

    Panerai 只係潮物,唔係傳統大牌,我就唔會浪費金錢在這個牌子身上。

    //反高潮地,我還是放棄了這些五、六位數字的名錶。反而對一些日本牌子的機械表產生了興趣。

    呢個真係好反高潮!

    同埋我個人唔鍾意戴皮帶,夏天好易焗到有手汗;而且皮帶除非用 Butterfly Buckle,否則傳統「打洞」式使用,好易整殘條皮帶。

    //錶盤上有一個動力計顯示剩餘的能量,適合好似我呢種第一次玩機械錶的低能仔

    我隻VC一樣用 power reserve 裝置,唔係淨係 for 低能仔用的。
    通常我兩隻VC輪流戴,唔用的就放入轉盒。
    https://magicianyang.blogspot.hk/2016/09/blog-post_2.html

    //咁大個人先知道機械錶原來無石英錶咁準,誤差以日為計算,即係每日都會誤差一兩秒咁。
    //最重要係有誤差 --> 唔 "準", 所以都係石英錶好!

    機械錶唔準?誤差以日為計算?係唔係講緊某啲品牌?呢啲品牌又有無出複雜款式如陀飛輪、萬年曆、三問之類?出得呢類錶的品牌,如果「誤差以日計」,就真係羞家死,唔使出嚟行了。

    //不過而家人大左覚得咪又係錶一隻, 戴出黎又怕比人偷又怕比人搶, 而且要錫住戴
    //好似誠哥咁,邊駛靠隻錶,用太陽能石英錶,又型又準又環保

    https://thestandnews.com/personal/%E8%A1%A8%E6%BA%96/

    「就算唔係貪慕虛榮,都肯定係想曬命;二千蚊都買到嘅嘢,點解要用二十萬買?」幾蚊雞可以買到個牛奶公司甜筒,點解你要用十幾蚊買支 Haagen Dazs 雪條?十幾蚊可以買到 Haagen Dazs,點解你要用四十蚊買杯 Lab 雪糕?仲要 post 埋上 facebook 喎,係唔係想話畀人聽你巴之閉食得起 Lab?唔係,通通唔係。食 Lab 唔食牛奶公司,係因為你對雪糕有要求;買到一樣達到你要求嘅嘢,係一份滿足感。Post 上 facebook,係想話畀人聽你食過 Lab 雪糕,因為,最老套講句,你覺得 Lab 反映到你嘅生活態度,而你好希望同其他人分享你呢份生活態度。
    戴表和食雪糕一樣,是一種追求,一種對滿足感的追求,一種對生活態度的追求。有些不屑名表的朋友,覺得這種追求膚淺,而且最愛引用誠哥做例子,說真正有身份地位的人不會追求這些,誠哥也只是戴普通表云云。其實,佢老人家信佛,去到富貴如浮雲嘅境界,你又信佛嗎?佢後生拼搏,直情是拼埋條命去搏,天天在公司奮戰十六小時,你又有這樣刻苦嗎?佢喺屋企白飯清菜,簡簡單單又一餐,你又可以食得咁齋?咁多好嘢畀你抄,你淨係抄到佢唔帶名表最表面呢樣,膚淺嘅係你,定係帶名表嘅人?再者,講到身份地位,誠哥當然有分量,但 Warren Buffett 呢?Carlos Slim 呢?1963 年,大喊一句 I have a dream 的馬丁路德金呢?他們戴什麼表,你又知道嗎?不喜歡名表不要緊,但不要用一些不是理由的理由去攻擊別人對表的追求,尤其是男人對表的追求。

    但要講到名表,其實真的不太多,個人認為,四大名表當然是 AP、江斯丹頓、PP、和 Piaget 了。買過表的人一定會同意,揀表的過程比戴表更過癮。當你去到四大名表的境界,你就更不能受人擺佈,要集中精力想想,如何透過一隻表去表達自己。要霸氣,梗係 AP 嘅巨型表面;追求極致工藝,唔使問,PP 囉;穩重成熟阿伯型,江斯丹頓;我自己最愛 Piaget,即是伯爵,就連秒針跳動的聲音都滲著品味。
    ***
    其實我想講,伯爵主要都只係放啲鑽石上表面 mark up 個價而已...在此又介紹下魔術師所鍾意的其他品牌:

    近年積架(Jaeger-LeCoultre, JLC)出的親民版萬年曆(即係電影《奇異博士(Doctor Strange)》戴嗰隻),鋼版未折前都只係賣15萬,折咗之後應該10萬鬆啲就有交易。呢隻 JLC 的 表面 design 非常之整潔,時間亦易睇,:
    MASTER ULTRA THIN PERPETUAL Stainless Steel
    http://www.jaeger-lecoultre.com/hk/en/watches/master/master-ultra-thin-perpetual/1308470.html

    相對起來,VC OVERSEAS ULTRA-THIN PERPETUAL CALENDAR 咁,月份嗰 part design 得唔係咁好,間距太過密了:
    http://www.vacheron-constantin.com/en4/watches/overseas/overseas-ultra-thin-perpetual-calendar-4300v-120g-b102.html

    另外朗格(A. Lange & Söhne)都係非瑞士錶的大牌選擇,我都好鐘意,可惜佢無淨萬年曆系列,死都要搭埋陀飛輪,搞到好鬼貴:
    https://www.alange-soehne.com/tw/timepieces/lange-1/#lange-1-tourbillon-perpetual-calendar/introduction/720-038

    回覆刪除
    回覆
    1. 原來魔兄九年前已經有講過機械錶。

      Panerai真係潮流野,特別係興機師個段時間。

      我之前都有一隻皮帶錶,就係載到個洞口位斷咁濟,後尾自己換左條蝴蝶扣,今次呢隻都係蝴蝶扣。

      我話個能量儀適合我係因為從未載過自動錶,很好奇幾時有電同埋用左幾多電,套用你當年的例子,有呢個顯示就唔會因隻錶停左而嚇一跳。

      隻積架好靚,設計簡潔,月份和星期那個小盤都很精緻。

      朗架個隻都好特別,好似好多機關咁。

      多謝你既介紹

      刪除
  4. 點解魔術師可以打咁多字, 真係好勁, 我自己好懶
    我自己對LUXURY GOODS 免疫, 但因工作關係對錶都有少少認識。

    「機械錶唔準?誤差以日為計算?係唔係講緊某啲品牌?呢啲品牌又有無出複雜款式如陀飛輪、萬年曆、三問之類?出得呢類錶的品牌,如果「誤差以日計」,就真係羞家死,唔使出嚟行了。」
    唔同意, 有D品牌會做高級錶款但誤差都可以好大, 甚至乎有好大既 QUALITY PROBLEM, 例如 ROGER DUBUIS


    「其實我想講,伯爵主要都只係放啲鑽石上表面 mark up 個價而已」
    非常讚同

    「四大名表當然是 AP、江斯丹頓、PP、和 Piaget 」
    四大名表外仲有四大廠, ZENITH, PP, ROLEX, JLC - 所以JLC 都好多人擁護, 自己就鐘意 ZENITH 呢個 BRAND 多D

    「另外朗格(A. Lange & Söhne)都係非瑞士錶的大牌選擇,我都好鐘意,可惜佢無淨萬年曆系列,死都要搭埋陀飛輪,搞到好鬼貴:」

    我覺得 ALS 最出名應該係跳字裝置, 呢個真係好創新, 至於 陀飛輪 / 三問等 我覺得真係無實際用途, 純工藝表現。同埋佢係拍賣行既價都好硬, 同 PP 同級。

    我識好多鐘意玩錶既人, 真係鐘意玩錶既人係唔同周街 SHOW OFF 果種人, 比例如 PANERAI 有隻係bronze case, 佢會話俾你聽點解佢要咁 DESIGN, CASE BACK 點解要做厚底同用其他MATERIAL, ETC. 佢地真心有研究同話到俾你聽呢隻錶有咩特別。

    BTQ, 魔術師咁有米, 有冇玩 ATMOS CLOCK?

    回覆刪除
    回覆
    1. //有D品牌會做高級錶款但誤差都可以好大

      咁又係,依家連港產錶都話做陀飛輪, 真係無眼睇.

      //JLC 都好多人擁護

      喜歡積架, 由 Reverso 開始

      //我覺得 ALS 最出名應該係跳字裝置, 呢個真係好創新

      Yes, 呢個又係好鬼正.

      //魔術師咁有米, 有冇玩 ATMOS CLOCK?

      有米就唔係嘞,我都唔捨得將個 portfolio 轉哂防守收息從此退休;所以錶我都係玩返10來萬的入門版算了,如果用幾十萬,不用再裝潢下間屋玩 7.4.2 Dolby Atmos / DTS:X 仲過癮.

      //真係鐘意玩錶既人係唔同周街 SHOW OFF 果種人,

      我都唔鍾意showoff, 係鍾意遇到「鍾意showoff」的人時, 佢 showoff 我就屈返佢機, 感覺好鬼正.

      刪除
    2. 兩位都好強,又四大名表又四大廠,我只係識睇漫畫識得四大名捕。。。

      // 陀飛輪 / 三問等 我覺得真係無實際用途, 純工藝表現。

      同意

      //咁又係,依家連港產錶都話做陀飛輪, 真係無眼睇.

      呢D純粹係潮流野

      //showoff 我就屈返佢機, 感覺好鬼正.

      各位觀眾,五條煙!

      刪除
  5. 如果喜歡SEIKO,推薦GRAND SEIKO,是個低調又司文的好錶.

    回覆刪除
    回覆
    1. 多謝推薦

      其實今次都有睇GS,不過第一次買機械表唔敢買太貴

      刪除
  6. 喺我嗰行,見尽名錶。有啲保險agent刻意用名錶去做recruitment。 無可否認勞力士係最大路入門,襟/粗用嘅選擇之一。

    我都鍾意機械錶,十隻八隻擺喺屋企。價錢由千零蚊到十萬不等,過咗十萬嗰啲真係不捨得買。不過近年帶得最多:斯文嘅我會用fm,戶外既你估我唔到,我用返十年前,千零二千蚊買落嘅山度士潛水錶。 鋼水足,錶身厚肥,可樂圈,一百米潛水,條街冇人用仲開心。 以前仲有一只樂都,應該好少人識。

    回覆刪除
    回覆
    1. //有啲保險agent刻意用名錶去做recruitment。

      呢啲正正就係「佢 showoff 我就屈返佢機」的人. 佢帶撈咩, 我拎隻VC出嚟, 佢大我唔到的 (係咪好乞人憎呢?)...

      刪除
    2. 其實,我想deliver嘅訊息係, 錢係撻我唔到嘅; 要說服我(無論係sell嘢抑或係「跟你搵食可以賺幾多」),就請用閣下的知識和學問, 但係呢一關真係唔係好多人過到.

      刪除
    3. 我個行以前都係用撈黎嚇鬼, 不過而家有都唔敢拎出黎, 因為最賺錢個班多數都係帶apple watch

      刪除
    4. Agent載一D係人都識既高級貨,可以比較快地提升自己係初相識既人心目中既印象。

      //條街冇人用仲開心

      呢種真係有品味既回報,識貨既人極少。

      刪除
    5. 魔兄,真係俾人純粹用錢說服到既人,質素都好低,完全同你唔同級數啦

      刪除
    6. 高科技野而家先至係夠sex既野,古典工藝技術係小眾野

      刪除