2017年5月9日 星期二

三人世界 - 讓孩子獨佔父母的機會

話說係幾個月前,阿仔學校有一個校外親子活動,該活動是在區內一個室內體育館進行的。那天我們一家四口參加了,阿女當然咩都玩唔到,我們兩公婆便輪流和阿仔參與老師準備的遊戲,那個早上大家也玩得很開心。

校內活動的相片有其他同學仔便不貼了,這是在荃灣公園的相片
這種需要左右腳交叉式行走的設施是想訓練小朋友成為未來C朗吧?

點都估唔到,事後班主任同我老婆講,她認為我們唔應該同埋阿女一齊出席這個活動。這活動應該是我們父母和阿仔一起參與,好讓阿仔擁有一個和父母一起玩遊戲的回憶。

老婆當時聽到的反應和我在聽她說時的反應一樣,都係O哂咀。家庭活動當然係一個家庭咁參與架啦。我們一家四口,有機會梗係做咩都一齊架啦,係咪先?

當然,我們好冷靜咁分析呢件事。班主任係一個很有經驗的老師,她本身亦擁有兩個孩子,她的意見值得我們參考。

諗深一層,我們一家由三個人變成四個人,我們是否太順理成章地認為阿仔已經完全接受呢個變化?阿仔會唔會有些時候都希望獨佔我們?

兩個問題,兩個假設吧。

第一個問題,我們假設阿仔已經接受了。他很多時候也會主動提起阿妹,我們有些時候也會試探式問佢去旅行唔帶阿妹好唔好,或者放假時擺阿妹係婆婆屋企好唔好,他通通都立即話唔好,驚死無左個妹咁既樣。

第二個問題,我們假設阿仔是希望有些時候獨佔我們的。這是人之常情吧,曾經是父母唯一的心肝寶貝,一舉手一投足也得到父母的全部關注。現在當然也是心肝寶貝,但獲得的注意力肯定是降低了的。事實上我們在阿女出世後也會間中安排我們其中一位單獨和阿仔活動的,但兩公婆一起陪著他一個的機會便甚少了。有些時候亦可以看到他是專登搞事去吸引我們的注意力的。

我們也是願意接受意見的家長,在阿仔剛過去的四歲生日那天,我們便三人世界了一整個下午,讓他做回備受注目的男主角。

其實最掛住阿妹既就係佢

點都好,我覺得今次老師呢個意見幾好,我們當然以一家四口活動為主,但有些時候安排一些讓孩子和父母獨處的機會也是不錯(話唔埋這些快樂的經曆可以令他產生不少多巴胺和血清素)。

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

6 則留言:

  1. 細路仔既野, 一點一滴都要形成他日後的性格, 或許真的要注意:)

    回覆刪除
    回覆
    1. 非常同意塘人兄既講法,性格呢樣野同自小經歷真係好有關係

      刪除
  2. "他通通都立即話唔好,驚死無左個妹咁既樣"
    阿仔真係好乖好抵惜!

    回覆刪除
  3. 這個班主任很好,其實她這個意見一般都不會受家長認同和接受,但她卻有勇氣向你們表達,證明她不只是在討好家長,只是做真正的教育。(純粹個人感覺)

    回覆刪除
    回覆
    1. 係呀,呢間學校真係好,不單只教育小朋友,仲關心埋小朋友的家庭生活,係一間充滿愛和快樂的學校

      刪除