2017年4月19日 星期三

小童遊台中南投

復活節假期去了台中和南投旅行,當係慶祝阿仔四歲和阿女半歲生日。台中市就像無咁繁忙和多人的台北,有幾個夜市和靚公園。南投市很像日本四國內的德島縣,鄉下地方,到處都是大自然景色,另外有不少可以親身體驗的玩意。


就像以往的小童遊首爾小童遊台北,下面會講下台中南投有咩適合一家大細玩,最後講埋當地交通和住宿。

台中 - 植物園



有一個很大的溫室,很多植物和一個起碼五層樓高的人工空中瀑布。阿仔對那些從未見過的植物也甚有興趣。

台中 - 國立自然科學博物館




我們沒有參觀,只是經過館外的大草地和一個設計精美的庭園,環境十分舒適。

台中 - 國立臺灣美術館



兒童館值得推薦。不算十分大,但玩意甚多。有手工製作、有大型砌積木(是真的一塊塊實木,打中腳指應該會好痛個種)、鏡中畫畫、水筆畫牆和暗黑迷宮。

另外亦有一個小區域供嬰兒訓低、滾動和爬行,總算有個地方適合只得半歲的阿女。我們平日下午到訪,人數不多,但最好還是預先網上預約。

台中 - 草悟道



我們是先參觀植物園,然後穿過科學館,再沿著草悟道行去美術館的。草悟道是一條種滿樹木的行人道,沿途放置了不少大型藝術品,沿著街道的兩旁有不少看似很精緻的餐廳。很現代和浪漫的一條街,我們兩公婆也忍不住要手拖手行左一陣。這裡假日還有露天市集,可惜我們時間不配合。

美中不足是飯後下起超級大雨,我們還要行去美術館。我低估了距離,結果在大雨下足足行了差不多二十分鐘。

南投 - 造紙龍手創館




可以DIY一些用紙做的手工藝品,但職員講明唔建議小朋友單獨製作,因為大部份步驟需要使用熱熔槍,小朋友可以參與的步驟不多。但我們還是做了一個大象筆插和比卡超匙扣,阿仔雖然參與不多,但也專心地看著我們做。

南投 - 紙教堂




原本以為只係得一個教堂睇,純粹順路去睇下,點知有驚喜。入面有幾個池塘和很多植物,阿仔人生第一次玩怕醜草就係呢度。紙教堂座建築物本身反而流流地。

南投 - 埔里酒廠




估唔到酒廠都適合小朋友,入面有一些介紹原住民的圖片和製酒工具,較有趣是一些供拍照的道具和一條模擬醉酒後失去平衡的小通道。

南投 - 清境農場




餵羊、好曬、飲羊奶、好曬、食羊奶雪條、好曬、餵羊、好曬、飲羊奶、好曬、食羊奶雪條、好曬

山上好風光,仲有櫻花睇,唔錯。

南投 - 小瑞士花園




地方唔算好大,設計精美。入口處有台中連鎖餐廳紙箱王,消費一定金額後可免費換領小瑞士花園的門票,食飽入花園散步無得頂。

南投 - 敲敲木工坊




在這裡可以買一些木製品,帶回家或即場製作都可以。老婆和阿仔即場造了一個小音樂盒,另外買了一個掛牆鐘和胡桃夾子公仔回家整。

平日現場DIY需要預約,週末唔需要,請留意店舖部份只營業到下午三點。

南投 - 日月潭


去過既朋友都話日月潭和普通水塘無咩分別,所以我們只安排了在這裡逗留一小時,包車司機建議了我們參觀向山遊客中心和文武廟。司機無介紹錯,朋友們的意見亦都無錯。

南投 - 九族文化村



比想像中好玩的地方。有原住民表演、機動遊戲、超大宮廷式花園和纜車,這段時間有咸蛋超人特別節目,場內到處都是咸蛋超人和怪獸。

阿仔真係長大了,很多機動遊戲都夠膽玩,連以前喊爆唔肯坐的纜車都克服了。我們在原住民的表演環節中更被選中參與一個小遊戲,得到一份小禮物。

交通


台中沒有地鐵,公共交通工具只有巴士。使用悠遊卡坐巴士,十公里內免費。我們因為只在台中逗留兩天便懶得買了,坐了三程巴士,超級多站,感覺上好像不斷在轉來轉去。坐了一次的士,感覺上好像也是不斷在轉來轉去。

南投是鄉下地方,比較難依賴公共交通工具,所以我們包了車。$5,500台幣一天,可用車十小時,價錢包油錢泊車和司機饍食。加鐘的話就$500台幣一個鐘,我們有一天用多了兩個鐘,埋單時司機很客氣說不用算加鐘錢,一輪推讓後才肯收錢。

第一次包車,有司機隨傳隨到的感覺十分良好。我們每天也是前一天提供明天的行程給他,問他我們的計劃是否可行,他每次也是說OK的。我們的行程精密度是以半小時為單位,最後大部份也依計劃達到。

親子民宿


親子旅行來台中入住親子民宿是指定動作吧,我們入住了兩間,兩間都在日月潭附近。

第一間是橙林小徑,房內有附設滑梯的床,室外有一個小型電動車場、遊樂場、決明子池和只在夏天開放的小泳池。阿仔在這裡第一次看到白兔。


第二間是日月潭原森林,這酒店走型格路線。我們住日出房,有落地大玻璃,職員話可以睇到日出,但我們當日朝早多煙霞,五點幾起身咩都睇唔到。大堂有一個區域放置了一些玩具和書籍,可以拿回房間。



事後問阿仔下次想住邊間,佢話兩間都要,正一花心蘿蔔。

而我們在台中住的是一間全自助酒店,除了早上有機會見到執房員工外,全間酒店沒有任何職員!Check-in和check-out都是自助式機器,最大開眼界是機械臂寄存行李,十分利害!



---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

12 則留言:

  1. 回覆
    1. 真係唔錯,性價比仲幾高,比一般酒店多適合小朋友既玩意

      刪除
  2. 阿女半歲去旅行有冇問題啊?我都想等我阿b一歲去台北玩幾日。

    回覆刪除
    回覆
    1. 無問題呀。

      最穩陣就係自己帶水、床單、毛巾、吹氣沖涼盤呢類貼身用品,盡量跟番日常作息時間。一歲食半固體食物為主,可以試下用保溫瓶焗粥,再加那些即食嬰兒食物,最重要係先係香港試過先,唔好去到先試。

      台北好先進,唔洗擔心,可以參考下我篇小童遊台北,如果識行識走去親子館會幾好玩。

      刪除
  3. 台中南投仲有好多地方玩架,科博館無入去有D可惜,下次再去過啦。

    回覆刪除
    回覆
    1. 台中市我預左兩日咋,係要作取捨架喇。將來阿女大少少,識行識走再去過啦。南投俾我既感覺真係幾好,多自然環境,地方清潔,食物抵食,又多野玩。

      刪除
  4. 睇完你介紹令我想快D去旅行,我個囡都快歲半,試吓plan一次全家旅行先。

    回覆刪除
    回覆
    1. Gogogo!

      雖然小朋友將來必定唔記得,但係父母會記得,佢哋亦都可以睇相。這些體驗雖然比較辛苦,但十分珍貴。

      在旅途中斷絕了日常的各種煩惱,專心一致地陪伴家人,真的是不錯的時光。

      刪除
  5. Hi mike , 五月中我全家出發去osaka六日五夜。 預訂定咗民宿及自駕汽車。(老婆全職做司機因為我唔識揸車😊) 帶埋工人姐姐去,因為特價機票套餐再加上她本身要出一出境。5歲家姐已經搭了兩次飛機,4歲數細佬是第一次,我都有啲緊張。

    回覆刪除
    回覆
    1. 去玩唔駛擔心太多啦。

      大坂市內比較多車,坐地鐵可能仲方便,去市郊就值得揸車。我早幾年阿仔一歲個陣都去左大坂同四國,去四國個幾日就自駕。你都可以考慮下去淡路島,睇花一流。當然仲有麵包超人館,細路實鍾意。大坂市內有間阿卡將,好多細路仔野賣,好抵。

      刪除
    2. 唔駛客氣。老婆要揸咁耐車,記住陪下佢傾計,唔好成車人訓哂覺呀,同埋有機會就停低休息下。

      刪除