2017年2月10日 星期五

曬相

隨著數碼相機和智能手機的拍攝功能愈來愈好,而且大家亦已經習慣利用各種社交網絡去分享相片,相信很多人已經很久沒有去相片沖印店曬相了,但我們家還是保留了這習慣。

因為手機影相實在太方便和快速,很多時大家拍照時也習慣了補多幾張,我們拍攝小孩時更經常連拍超過十張。另外有些時候更會“多機拍攝”,例如阿爸阿媽各一部電話另加一部數碼相機。這些也大大增加了揀相曬和之後排次序的困難度。無論如何,我還是繼續進行數月一次的曬相活動。

難得一張兩個都咁正經的兄妹合照
難得一張兩個都咁正經的兄妹合照

一不做,二不休,我曬相是人人有份的。即是一張我們一家四口的合照,我是會曬三張的。我們兩公婆一張,阿仔阿女各一。如果有和其他親戚的合照,也是會多曬一份給他們的,四大長老收到都會很高興。

老婆有提過阿仔阿女唔駛一人一張,但畢竟他們長大後也是兩個獨立的個體,唔通到時叫他們分相咩。

其實還有另一個原因的,兩兄妹而家仲好細,我們做父母尚有很大的影響力,但到他們長大後,甚至我們過身後,便完全是他們自己決定自己的人生,我無法控制他們長大成人各自成家後的關係如何。留下一些他們兒時相親相愛的相片,在他們出現爭執或甚少聯絡時,唔覺意睇到這些相片,可能有機會令他們重新拉近對方呢。

一首Punk歌可以救地球,就讓我們預先為他們建立這些機會之橋吧。

順帶一提,我們是使用某日本簡約牌子的相簿,最喜歡它儲存量高而且絕不花巧,甚麼圖案也沒有,由拍拖用到而家一家四口,屋企已經有很多本。

大家有幾耐無曬相呀?手執一張實體相的感覺還是不錯的。

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

Related Posts Plugin for WordPress, Blogger...

17 則留言:

  1. 我年輕時都會為仔女儲相, 每人一本相簿, 之後變一人幾本, 不過之有scanner 後, 就把相片scan 去硬碟, 又燒碟出來分俾佢地, 而相簿就收起啦 :)

    回覆刪除
    回覆
    1. 我個仔而家都有兩本了。

      逐張逐張scan都好大工程,Lisa姐好有心機呀!

      刪除
  2. 我已經無咗這個習慣。=_="

    回覆刪除
    回覆
    1. 哈哈,唔知我可以維持到幾耐

      刪除
  3. 我之前都好鍾意曬相出來睇,但隨住D相愈影愈多,淨係定期將幾部手機D相攞番出來file好抄落電腦都哂好多時間,好耐都無揀相出來曬啦。

    回覆刪除
    回覆
    1. 真係好花時間,搞親都成粒鐘。特別係而家可以直接用電話backup上cloud,唔駛再專登抄相入電腦,變左成件事好似只係為左曬相。

      刪除
  4. 記得曬多幾張,由幼稚園到初小,好多功課都要交小時候成長照片、家庭照、全家福,一去冇回頭。

    回覆刪除
    回覆
    1. 有D相片放耐咗會變黃和退色, 所以最好 scan 來保存 !

      刪除
    2. 池兄,返學真係成日要交相,幸好有大量儲備,電腦內的檔案亦分得甚整齊,隨時都可以找回。

      Lisa姐,實體相scan左係比較好保存

      刪除
  5. 好爸爸 XD 我都好想搵返細個啲相 T.T

    我覺得實體相反而睇得多過電腦相,同埋要變黃咗,有歷史痕迹,更加有紀念價值 :P

    回覆刪除
    回覆
    1. 細個嗰陣,屋企人都有幫我影唔少相,睇番都有不少回憶

      醉心兄記得幫老婆影多幾張,這些時期一生人唔係好多次。

      我都認為番睇實體相比數碼相的機會大很多,有歷史痕跡便更有味道

      刪除
  6. 我亦有曬相,好似有Hardcopy穩陣D。

    回覆刪除
  7. 以前會曬,而家都想曬,但問題係相累積太多,冇時間慢慢揀相!

    回覆刪除
    回覆
    1. 太多真係一個大問題,所以我盡量幾個月曬一次,否則見到太多真係會想放棄

      刪除
  8. 有冇晒相地方推介? 快圖美加佢個APP...
    交功課用PRINT 相個D PRINTER 夠快.

    另看到, 年青人鐘意傳統晒相, 好老的人竟然又番轉頭數碼化...

    回覆刪除
    回覆
    1. 快圖美最方便但比較貴。我通常去荃灣一間曬相鋪,平時幾乎日日都會行過,好就腳。

      交功課有時我用彩Print落普通紙算數,反正好多時都係貼落份功課度,咩質地都無所謂。

      潮流既野本身就係不斷循環吧

      刪除