2017年2月13日 星期一

一個好消息和一個壞消息

好消息是我找到工作了。

壞消息是假期結束了,Orz!

由十一月離職至現在差不多三個月,這個假期比一般的學生暑假更長。這段日子想了很多不同事情,亦做了很多事情,但依然有不少希望做到的項目並未完成。無論點都好,縱使有兩個月缺少了工作收入,但我還是認為是賺了,更是賺了很多。

阿仔第一次釣魚
阿仔第一次釣魚

在離開舊公司前的數星期,我便在Google Keep建立了一條清單,記錄低有咩事項想係失業期間完成或建立一個長期習慣。隨著重新找到工作,現在稍為總結一下當中較特別的幾項。

陪老婆、陪阿仔、湊阿女


我成日都話其實我需要家人多過家人需要我,難得有一段時間可以做全職老公全職爸爸,當然希望做好一點。

老婆生完無耐,生理和心理上都需要時間復原。其實話就話陪老婆,老老實實,我撞少兩次板已經算幫忙。陪阿仔就睇舊文吧,學R兄咁講,教仔既野我都係慢慢學啦。湊阿女算係咁啦,會懷念照顧初生嬰兒的時光,但不希望再試,哈哈哈。

建立資產配置


參考舊文半桶水資產配置,正在一步一步建倉。因為新公司的一些褔利,可能會改變部份配置比例,遲下再講。

建立做運動習慣


失敗。這段期間有做運動,行了四次山和跑了一次步,但完全無法建立一個有規律的日常做運動模式。不過每晚也會抱著阿女係屋企行來行去。

設置小朋友房


失敗。家中有一書房/雜物房,一直計劃將它變成小朋友房俾兩兄妹訓,可惜尚未成事,但總算進行了一些前期準備工作。另外亦更換了已經有七年歷史的梳化。

拜山


在拜山習慣方面,我的家族並不像一般香港人,我們並不是清明重陽去拜山,我們是得閒就去,所以細個嗰陣去得好密,我的父母現在也是去得很密的,幾星期便會去一次。而我自己已經幾年無去,總算係上星期完成了這件事,算是和先人見下面吧。

學習


計劃了學習Python、寫app和製作infographic,全部失敗。反而學了jQuery和node.js,詳情留待另一篇講搵工的文章再講。另外也開始了儲PDU去續PMP。

返十年工放一個長假真係好爽,期待將來還有這些機會。到時仔女大個少少,或者我們兩公婆可以去一次超長旅行。


---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

20 則留言:

  1. 恭喜恭喜。
    返工最大的好處係有一張非常好用、不用白不用的糧單。(見魔術師文)

    回覆刪除
    回覆
    1. 多謝池兄。
      糧單真係有用,睇完魔兄篇文章先知自制糧單都幾多功夫。

      刪除
  2. 恭喜Mike兄開工大吉!親子時間永遠都唔夠咁,要好好珍惜呢👍

    回覆刪除
    回覆
    1. 多謝Cherry姐,係啦,永遠唔夠,好想可以一日到黑都陪伴著佢哋,哈哈哈

      刪除
  3. 恭喜!~~~
    久唔久放下假, 又睇下日子如何運用, 有助他日唔做唔駛咁悶.
    否則, 第時你我財自, 只能互相留言渡日. (講笑)

    回覆刪除
    回覆
    1. 多謝70後兄。無錯,要預習下日子點樣過。到時可以多些見面吹水啦。

      刪除
  4. 過一過冷河再忙過! 正~ Infographic 我都有興趣,但仲未搵到個啱用既software,可以參考下呢個blog

    http://blog.infographics.tw/

    回覆刪除
    回覆
    1. 多謝醉心兄介紹,infographic在表達資訊方面的確唔錯,有些人甚至用它整CV,幾搶眼

      刪除
  5. 唔駛幾耐財自之後,每年放3個月假,目標通通可以完成。

    回覆刪除
  6. 恭喜搵到新工作,,
    祝工作順利,,又有好的環境同同事,,
    作為一家之主我地都要比別人更努力,,
    也要努力做好爸爸同老公,,
    這不簡單,,所以財務自由更讓他們有更大的保障,,
    努力,,互勉之...
    cleverpeople...

    回覆刪除
    回覆
    1. 多謝clever兄,一起加油努力,唔簡單都可以做到!!

      刪除
  7. 手把青苗插滿田
    低頭便見水中天
    六根清淨方為道
    退步原來是向前

    投資和工作有時和农夫耕耘一样, 稍稍退後,行得更遠更闊。爸爸們加油,祝福家人安康,新工作順利☺

    回覆刪除
    回覆
    1. 多謝喜爸爸。

      第一次讀到布袋和尚這首詩,有意思!

      你講得很好,不斷低頭向前衝,有時反而不及停下來看清大局。

      刪除