2016年11月15日 星期二

教壞人的童話

半桶水爸爸一直相信小朋友可以通過閱讀故事書去建立價值觀和認識生活知識。但市面上有一些小童書籍充斥著不良價值觀,小朋友睇完隨時學壞,家長應加以提防。



近排夜晚都讀呢本書俾阿女聽,講左幾個故事真係覺得唔對路,價值觀完全錯誤。書內幾乎每個故事都有一個終極目標,就是每人也要不顧一切和王子公主結婚,然後就幸福快樂大團圓。當中直接了當,全無交代,權力就是王道。

以下舉幾個精彩的例子,大家自己領悟。請注意唔係我專登簡化,本書入面就係咁直接。

聰明的農夫女兒—一對很窮的父女得到國王送贈的一幅土地,農夫在土地中發現一件金器,上報國王,國王懷疑佢收埋其他寶藏,將他收監。後來國王聽說農夫的女兒很聰明,就出難題給她(那條難題仲要人地唔著衫,好一個咸濕國王),假如她証明到自己聰明就放過農夫,及娶她為王后。最後女兒順利解決難題,成為王后。

灰姑娘—王子在擇偶派對遇上靚爆鏡的灰姑娘,但去左灰姑娘屋企兩次都認唔出無打扮的灰姑娘。最後索性認腳唔認人,灰姑娘後母從勇兩位姐姐削足就履去穿玻璃鞋,搞到血染玻璃鞋王子都唔知,要靠別人提醒才知道。最後當然係王子獲得美人歸啦。

青蛙王子—公主有日獲得一青蛙幫忙,但公主事後違背承諾,唔願意和青蛙做朋友。青蛙死纏爛打,終於逼到公主俾佢入屋,但青蛙要求上床一齊訓(佢都係一隻咸濕既青蛙),公主一怒之下將佢掟走,結果青蛙立即變靚仔,兩人立即結婚,永遠幸福快樂。

自小建立錯誤價值覲,之後想改就難


本人才疏學淺,未睇過原裝版本的格林童話,所以唔肯定是原裝格林童話有問題還是此版本將內容過於簡化才會出事,但我認為這種進入王族就是硬道理的故事絕不可取。

老實講,如果呢本係全新創作的故事,我未必會專登批評,但此書打著經典的旗號,家長可能會並不太留意內容,小朋友好容易在不知不覺間建立不良價值觀,誤以為權貴就是至高無上,之後想改正都幾難。

大家有沒有遇過教壞人的兒童圖書?

---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feedEmail接收半桶水爸爸最新文章。

28 則留言:

  1. 原本格林童話好多都好血腥同色情。
    好似白雪公主就俾佢老豆攪!!

    回覆刪除
    回覆
    1. 難怪咁多同人版和恐怖版格林童話...

      刪除
    2. 言兄係咪搵錯咗本成人童話嚟睇呀XD

      刪除
    3. 這些故事都很容易改為成人版,仲要咁多公主...

      刪除
  2. 200年前的德意志價值觀,從現代東方價值的角度看起來離地是難免的吧。

    回覆刪除
    回覆
    1. 係既,時代唔同價值觀真係唔同,而家真係感到好突兀

      刪除
  3. 其實我在荷蘭讀書時都讀過格林童話, 是好純真的, 是否俾人改寫咗 ?
    聰明的農夫女兒- 沒讀過
    灰姑娘 - 可隣的女仔俾後母和繼姊欺負, 要坐南瓜變出的車去ball, 結識王子, 但因為要12點前走, 唔係馬車會變回南瓜和老鼠, 所以跑走時掉了玻璃鞋, 最後都可以同王子結婚 ! 無削足呢樣野 !

    回覆刪除
    回覆
    1. 咁王子其實咩都無做過,除了錢和權力,憑咩要個個女人排隊俾佢揀

      刪除
    2. 王子有錢就夠了, 可能是當代好多窮女仔的夢想 !
      你可以解俾自己女兒聽, 做女人就算窮, 都可以白手興家, 不須靠男人 XD !

      刪除
    3. 衰在書內大部份故事都有類似內容

      刪除
  4. 而白雪公主都無俾人搞, 只是佢繼母王后唔鍾意魔鏡說白雪公主是全國最靚, 所以扮老婆婆送蘋果想毒死佢 !

    回覆刪除
  5. 其實呢D故事是說古代西方國家的情況, 當時好多富貴貴族和太多的窮人家, 而故事中帶出好多教材, 如唔好亂信人 !

    回覆刪除
    回覆
    1. 我認為好壞夾雜,例如大拇指湯姆便教人違反合約

      刪除
    2. 唔記得呢個故事講乜了 XD !

      刪除
    3. 哈哈,這些故事如果唔係陪小朋友都好難有機會睇

      刪除
  6. 價值觀,只有接受不接受,沒有對與錯。我也自覺正正常常,勤力工作也聰明,為何冇職升?對上司言聽計從的同事有職升 wor。有個我成日覺得佢做錯嘢的女仔和大老板結婚添!
    和王子公主結婚的故事我們認為教壞細路,但它的確是快速成功的方法,只是我們不認同罷了。可能當小孩大一點,這種故事還是要向他們說一次的。讓他們知道世界上貪名貪利貪上位的人多的是。遇到了請不要覺得驚訝。

    回覆刪除
    回覆
    1. 依家好多女仔都只想嫁富豪, 可以得到幾層樓 !
      呢D唔同的價值觀, 唔係我杯茶 !

      刪除
    2. 匿名朋友,你有道理,現實中好多野都好難解釋。唔合理既事不斷發生,這些事情名利場上更加常見。

      你提議的做法幾好,大過左再講多次,和小朋友一起討論,他們到時亦累積了不少人生經歷。

      刪除
    3. 今日報紙刊登了一個成功女性選舉,徐子淇得到第一位,報紙評論她為財富與家庭俱備

      刪除
    4. “報紙評論她為財富與家庭俱備”
      哈哈咁都得!有時哋報章可能只想搞噱頭,冇noise仲慘過冇integrity吧~

      刪除
    5. 咁以現況去睇,佢的確係財富與家庭俱備,絕對係萬中無一的成功例子

      刪除
  7. 或許有呢啲題材,就算被改過,家長與子女可以一同思考,時勢不同,能運用的手段就只好順應時勢,如秦始皇焚書坑儒,捉民工起長城,表證簡單地指明他殘暴,實情是秦始皇被道士所騙,旁臣借機玩權力鬥爭,築長城是為了保護邊境城市,因此沒有對與錯嘅。

    回覆刪除
    回覆
    1. 塘人兄講得好,有些故事的確需要家長和子女一起討論,書本上表面所講既野未必係全部

      刪除
  8. 阿仔之前返幼稚園每隔一個禮拜就要做借圖書閱讀報告,簡直係超級苦差,好多圖書內容都不知所謂,故事無教育意義又唔吸引,有啲連大人都唔知佢想講乜......所以我好少會主動要求阿仔睇故事書,我寧願自己作啲切合現實既故事講比佢聽,例如3隻小豬我改做3個小朋友,3個老人家等。


    回覆刪除
    回覆
    1. 森而兄可以考慮將自家創作的故事輯錄成書出版

      我自己比較喜歡講生活化的故事,唔係咁喜歡那些滿是道理的故事

      刪除
  9. 如果WIKI資料正確,「成人版」內容先係「正貨」...難怪改完都唔啱小朋友睇,最神奇係可以升上神枱被視作經典「童話」 XD

    https://zh.wikipedia.org/wiki/%E6%A0%BC%E6%9E%97%E7%AB%A5%E8%A9%B1

    回覆刪除
    回覆
    1. 學池兄咁講,時代唔同左,好多諗法都唔同。

      同埋似乎當時社會對書內部份故事是否適合定義為童話都有不少異議。

      另外可能因為當時並沒有人有咁大規模地收集童話故事成書,物以罕為貴,所以成為經典

      刪除