再談孩子的閱讀興趣

原來距離上一次在這裡提到兒子的閱讀興趣已經兩年有多，係網上報紙見到鄺穎萱介紹長谷川義史這位兒童圖書畫家，便忍唔住要寫番少少跟進。

非常好彩，直至現在阿仔依然很喜歡看書，每晚睡前必需和他伴讀兩本小書，熄燈後還要再多講一個故事他才願意乖乖訓覺。因為睇得多，定時定候都要去圖書館補倉，如果剛借了一些他十分喜歡的書籍，更會由早到晚都捉著我們講俾佢聽。

閱讀必須有趣，才能建立興趣

阿仔都會睇卡通電視和電影，但每日不可缺少的還是睇書，去旅行都要專登帶幾本俾佢睇。我相信事必有因，能夠令到阿仔去到三歲半都依然以睇書為最大興趣，我們自少培養當然有關，但另一方面選書也是一大重點。

相信不少父母也會留意到很多兒童故事最後都有一些小貼士，總結一下故事內的道理、教訓或智慧。我們都講過不少這類故事，初頭我都會粗略咁講下那些小貼士,，但後尾發現唔對路，連我作為一個負責講故事的大人都覺得那些小貼士好鬼煩，強烈地減少我下次再講呢本書的興趣。

好簡單咁講，如果日日做完《愛‧回家》之後，都有條友同你回顧一下今集有咩小智慧，你諗下呢件事係幾咁難頂。

自少訓練填鴨，唔係呀化？

另一方面，我真係唔想咩都幫小朋友消化再餵俾佢食。首先如果本書有一些深奧的道理，真係超越左一個三歲小孩可以理解的能力，我強行講解只係事陪半功，大家都辛苦。如果書本既程度選擇適中，讓孩子自己領悟，唔係更好咩？其實，我只想建立孩子的閱讀興趣，並不是想追求可以即時見到的回報，他喜歡那個故事便已經足夠了。

長谷川義史 - 秘密

開頭講到鄺穎萱介紹的長谷川義史，他是日本一位兒童圖書畫家，畫了很多別人寫的故事，也畫了一些自己創作的故事。近一年來阿仔都睇左幾本佢畫既書，鄺穎萱提到的《男子漢阿茶》我們剛剛還了，現在借了另一本書《秘密》，之前還看了他畫的《我討厭去幼兒園》、《我吃拉麵的時候......》、《生氣》、《馬鈴薯家族》和《你最愛誰》。阿仔勁鍾意《馬鈴薯家族》，借完又還還完又再借好幾次，都仲係咁鍾意睇。其實故事內容超簡單，就係講薯仔一家係街市俾唔同既人類家庭買左，一家人各散東西，好鬼傷心咁樣。點知之後係學校重遇，因為佢地都成為左小朋友自己帶番學校既午餐，故事最後一句我好記得，“原來大家都鍾意食馬鈴薯，講完”。

生活化故事更適合小朋友

老老實實，這些故事真係無咩大道理﹝除了《我吃拉麵的時候......》，呢本書個名好流，但內容好堅，有機會再講﹞，但十分生活化，小孩子好容易投入其中。甚至佢自己在日常生活當中，都會自動提起某本書入面發生過他現在面對的事情。

作為怪獸家長，英文書籍當然唔少得，真心推薦Biff, Chip and Kipper Stories和Peppa Pig，兩個系列也是十分生活化的故事。

Biff, Chip and Kipper Stories

Peppa Pig

阿仔都好鍾意Roger Hargreaves的Mr Men系列，我相信主要是因為那些角色設定古怪。

Roger Hargreaves的Mr Men

電影的圖畫故事版也是不錯的選擇

電影的圖畫故事版

---------------------------------------------------------------------------------------------------------

多謝支持睇到尾，有任何意見或感想都歡迎寫低留言，你的留言是對作者的最大支持。

如果想最快睇到我的新文章，請Like半桶水爸爸的Facebook專頁或以RSS feed追蹤半桶水爸爸。