2016年8月18日 星期四

好爸爸送樓多面睇

半桶水爸爸今日睇左篇新聞,睇完真係自愧不如,自覺連半桶水都不如。

【Yoho好爸爸】蔡生:一間買給兒子 一間自己投資

這位大埔蔡先生,在元朗最新的樓盤入飛想買兩個單位,一間俾三十歲的仔仔,一間自己投資。這些真是名符其實的富爸爸,書本上那位富爸爸都係教你自己諗方法,點及真金白銀送你一間樓咁實際。

平心而論,這位大蔡先生幫助三十歲的小蔡先生實在用心良苦。假設小蔡先生大學畢業廿一歲,即使知慳識儉和唔去日本旅行,在廿五歲開始在少少經濟基礎,但卻一直遇上樓上升市,上車確實並不容易。

當然,學70後咁講,月餅唔駛急住買,無人話過一定要買樓。

退一萬步換個方向咁諗,大蔡先生可能係樓市玩家,玩開一開二,二開四,一生七宅,等等等等。當沒有工作能力的姐姐都可以揸幾層樓,用正值壯年的仔仔去買樓,其實係好初階既操作。

再轉個角度諗,小蔡先生可能遇著一位無樓唔嫁的絕世好女,大蔡先生都係想早日飲杯新抱茶。又或者小蔡先生仲係單身,擁有一間全新兩房單位後,比市區超微樓的家庭可擴充性大得多,吸引力立即升價十倍,候選佳麗由元朗西站排到南昌站。講到尾,大蔡先生都係想抱孫。

小蔡先生一覺醒來,人人恭喜他有個富爸爸,送他兩成首期。但午夜夢迴(或每到月尾),想到那每月供款萬七元*,想必別有一番滋味在心頭。

*每月供款萬七元:假設六百萬樓價,兩成首期,供三十年及按揭利率兩厘。

相關文章
---------------------------------------------------------------------------------------------------------

多謝支持睇到尾,有任何意見或感想都歡迎寫低留言,你的留言是對作者的最大支持。

如果想最快睇到我的新文章,請Like半桶水爸爸的Facebook專頁或以RSS feed追蹤半桶水爸爸

14 則留言:

  1. 仲要成世人聽老豆大支嘢咁講:[衰仔,唔係有我你有x樓住,訓覺把啦!]

    回覆刪除
    回覆
    1. 上埋報紙,就算本身個仔有料都俾人成世睇少。

      刪除
  2. 乜hold層樓真係咁重要咩~會突然飛上枝頭變鳳凰?
    呢件阿爸,同香討嗰位"鍾女"同出一轍呢~

    回覆刪除
    回覆
    1. 我無睇過鍾女,但老實講,對上七至八年,對一般唔識投資既人,有無上車係資產值上面真係好大分別。

      但無人敢講樓市長升長有。

      刪除
    2. 其實上一代只係由買金變咗買磚頭啫,感覺實在嘛。

      刪除
    3. 磚頭比黃金銀碼大好多喎

      刪除
  3. 呢單靠老豆,將會係佢d 舊同學聚會之時恥笑既話題之一。
    呢個時候,應該無人會覺得羨慕law...

    回覆刪除
    回覆
    1. 最起碼蔡蔡子無出樣!

      刪除
    2. 大蔡嬸,無興趣睇。
      小蔡蔡子,希望唔會係男人咁樣既老師或者護士啦。。。

      刪除
    3. 恥笑就一定架啦

      但前提係供完萬七後仲有錢去同學聚會先得

      刪除
  4. 明白做父母的苦心,之但係,買樓都係低調D好。。。

    回覆刪除
    回覆
    1. 好耐無見啦Tom兄!!!

      其實而家只係入飛,Tom兄身在外地可能唔知,新樓好難抽架。

      刪除
  5. 好難想像用萬七蚊供層個細單位係咩心態,除非收入好高,唔係就肯定供得好辛苦,完全唔值。

    回覆刪除
    回覆
    1. 都咁做有兩房既,唔係無房超微樓,算幾好架啦

      刪除